Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1410_1

<begin>
</begin>
<main>
Int jaer tien sDonredages na Pauli conversio wijsden scepenen eenen vonnes tusschen Martijn Damaesz aen deen zide ende Jacob Hont ende Willem Danelsz aen dander zide als van zulken lande gelegen tAlloysen dat Damaes die Hont ghegheven heeft Martijn sinen soen tot sinen hilike soe sijn brieve vanden hilixen vorwaerden begripen in deser manieren na woerde ende wederwoerde ende na allen brieven ende betoen die scepenen gesien ende ghehoert hebben ende naden ouden hantvesten vander stede ende vanden lande datmen alle erfnesse sculdich is te berechten binnen bans daert gelegen is ende na getuge ende waerheit die scepenen ghehoert hebben vanden rechter ende heemraders binnen bans dat si op beiden siden vorscr trecken sullen daer dit lant vorscr leit ende wien dat die rechter ende die heemraders kennen in die ghifte ende inden eygendom dat scepenen dien oic daerin kennen als recht is naden rechte vander stede ende heeft yemant opten anderen mit enigen brieven van hilixe vorwaerden of anders dat yemant den anderen gelooft mach hebben te seggen die spreke mit rechte die guede luden sullen enen ygeliken ghaerne recht doen
</main>
<end>
</end>