Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1411_1

<begin>
</begin>
<main>
Int jaer elve tSaterdages na onser Vrouwendach conceptio wart gewijst met vollen vonnes ende met allen rechte als op enen eyntachtighen dach tusschen den scout van sheren weghen optie een zide ende Pieter van Foreests maghen van sijns vaders weghe optie ander zide roerende vander dingtale tusschen hem beiden vorsz als of die maghen van Pieter Foreest vorsz sculdich sijn haer hande aen die roede te slaen ende haer hoghe boeten te waghen eer si die guede die Pieter Foreest vorsz aftergelaten heeft aen moghen vaerden ende deelen of niet in deser manieren dat na woerde ende na wederwoerde ende na alre bedingder tale ende na tuughe ende waerheit die scepenen ende rade daerof gehoort ende verstaen hebben soe Pieters Foreests maghen van sijns vaders weghe onderlinghe eens sijn ende gheen geschil en hebben onderlinghe als vander maechscap dat die maghen vorsz niet sculdich en sijn haer hande aen die roede te slaen noch haer hoghe boeten te waghen als omder deelinghe vanden guede die Pieter vorsz aftergelaten heeft als recht is naden rechte vander stede
</main>
<end>
</end>