Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1415_1

<begin>
</begin>
<main>
Int jaer ons Heren MCCCC ende XV des Saterdaechs nae datmen die Bamisse marckt inluyde doen dingde Reymbout Sebastiaensz van wegen Reynout Saressen in deser manieren alsoe Reynout beticht was van saken daer hy geen scult aen en hadde noch niet af en wiste ende daer een waerheyt of gehoert was soe hoepte hy datmen die waerheit sculdich waer te uuten hadde hy gebroeckt men liete hem beteren ende hadde hy niet gebroeckt men liete hem quijt ende datmen die waerheit uuten soude waert recht ende wijsdent scepenen ende geerde des vonnisse Ende dat vonnisse wijsde Borchart die Groet aldus dat scepenen ende raedt niet sculdich en sijn die waerheyt te uuten dan binnen jaers alst hem goetduncken sal Item soe dingde Reymbout voort van Reynouts weghen alsoe Reynoudt van betichten gegyselt waer ende van sake daer hy geen scult toe en hadde noch niet af en wist dat hy hem verborgen soude soe hy een poorter was ende hem oeck vreemde oesterlingen verborcht hadden ende dat een poorter billicx alsoe goet recht hebben soude als een vreemt man waert recht ende wijsdent scepenen etc Ende dat vonnisse wijsde Aert Heymanssen als dat hy hem niet sculdich en waer te verborghen ten ware hem ende der meente 1 lief
</main>
<end>
</end>