Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1415_2

<begin>
</begin>
<main>
Item int selve jaer ende opten selven dach dingde Willem Graman als borgemeester vander meenten wegen tegens den onderscout Willem Heinricksen inder stad jonchere Adriaen die bastert van Hollant overscout 1 als van een man genaemt Aertsen heren Willemsz die gevangen lach opten steen ende gecoft wart om LVII nobelen daer die borgemeester vander meenten 2 wegen dat derdendeel of hebben woude totter stede behoef Daer die scout op dyngde ende meende soe hy den man gevangen had ende niet wel betuegen en const ende hy om bede wille van syner vrienden gecoft was tegens den heere ende het geen verwijsde boeten en waren dat die heer sculdich waer dat gelt te hebben ende die stede niet waert recht etc Ende die borgemeester voernoemt dingde daerop vander stede wegen dat hy sculdich waer dat dordendeel te heffen van allen voerefeiten 3 totter stede behoef nae inhoudt coninck Wilms hantvest ende alsoe hy met recht een proeve hadde ende hy doen den man liet coepen dat hy sculdich waer dat dordendeel daerof te hebben vander stede ende meente 2 weghen ist recht etc Ende dat vonnisse wijsde Borchart de Groet aldus nae woerden ende wederwoerden ende nae alle bedyngder talen ende nae inhoudt coninckx Wilms hantvest dat die borgemeester sculdich is dat dordendeel te hebben totter stede behoef als recht is naeder recht vander stede
</main>
<end>
</end>