Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1416_1

<begin>
</begin>
<main>
Item want voirtijts biden alinge gherecht den ouden rade ende den achten ghemeenen dekens ende den ghemeenen neringen ende bider alinger stede eendrachtelic een ordinantie gheraemt gesloten ende mitter clocke uutgeclept ende geboden heeft geweest te houden als van eene nyewer draperie vanden wollenambochte daermen dagelix nu die Dordrechtsche lakenen op maect daer die guede luden vorsz ghemeenliken noch meynen bi te bliven sonder die ordonancie van yet te verminderen mer die altoes te meerren in alle poynten die der draperie ende der stede eere mede mogen dragen ende uut dien datter eenrehande luden wesen souden die dese ordinancie ende neringe vorsz vander draperie ghaerne te niete maken souden ende dagelix daertegens vallen soe die guede luden vanden gerecht vernomen hebben dat hemluden noch der ghemeente in gheenrewijs en staet te liden ende dat sie oic niet en meynen langer te ghehengen om die draperie vorsz in eren te houden soe is nu mitter clocke geboden ende is een ygelike gewaerscuwet dat hem niemant en sette tegens die ordinancie vander draperie vornoemt soe wie hem daertegens sette ende daertoe hielpe of arbeide mit rade of mit dade die te niete te brengen dat scepenen kenliken ware ende inder waerheyt bevinden mochten solider argeliste die verboerde sijn lijf
</main>
<end>
</end>