Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1435_1

<begin>
1 Int jair XXXV op sinte Bavenavont wairt byden rechter scepenen raet outraet achte dekens uut gemeenre mergenspraeck aangebrocht in koren geleit ende verdragen
</begin>
<main>
als 2 waert sake dat yement van onsen ingeseten poerteren enige scult sculdich ware enen anderen onseren poerter ende uter stede toghe enen dach of twe te voeren datmen dinghen soude van dagelix sculden datmen die poorter een blinde wete mocht doen tot sijnre woenstede in kennisse van sinen naesten gebueren ende so voert ene andere wete ende daerna die dorde wete altoes wanneer datmen daechde Ende waert dat die poerter binnen den drie weten aldus gedaen binnen der stede van Dordrecht quame datmen kenlic maken mochte dat dan die poerter mitter dorder wete gedaecht soude wesen ende datmen des anderen dages often naesten dingdage op hem clagen mochte Ende waert dat hi binnen dier tijt vanden drie weten voersz binnen der stede niet en quame mer hem buten der stede onthielde op X of op XII milen nader stede dat dan diegene die die wete aldus gedaen hadde of doen doen soude dien poerter mogen seynden een dagebrief om te verantwoerden van die sculde ende en quame hi dan niet na uutwisinge des daegbriefs 3 so soude dan diegene die die daegbrief geseynt had op hem mogen vervolgen ende clagen ter vierschaer mit rechte naden recht vander stede 4
</main>
<end>
</end>