Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1435_2

<begin>
Int jaer XXXV XXVIII dage in Meye was vanden goeden luden vanden gerechte bevolen hierin te teyken
</begin>
<main>
hoe dat opten datum voerscr voer scepenen inder kamer gecomen sijn Daem Willemssoen scout Jan Melissoen Heinric Willemssoen Gheen Ottensoen Aernt Cleissoen Jan Doncker Voppe Gherijt Martenssoenssoen oude heemraders in Nyeleckerlant in Alblassweert ende tuychen aldaer bi haren ede in tegenwoerdicheit vanden nyen heemraders dat hem kenlic is dat Gherijt Zebaers Wiggherssoen als een dijcgrave in Alblaserweert by vonnisse der dijckheemraders vanden weert voersz met recht gepant heeft aen een geheel weer lants ende hout drie hoeven genoemt Sconenborch mit allen sinen toebehoren so dat van ouds inden hoeffslach gelegen leit inden selven ambocht voersz als van makynghe des dijcxs van LXII 12 roeden die totten voersz hoeven toebehoren die den dijcgrave Gherijt voersz aenbestaet was in dijckrecht te maken elken roede voer enen Engelscen nobel in sinte Jans schouwe int jaer XXVI by vonnisse der dijckheemraders vanden weert voersz omdat den dijck niemant myn maken en woude Van welker pandinghe voersz mit recht ende na uutwisinge der dijckheemraders vanden weert voersz vonnisse een weet gedaen is ende teynde der weete ende den XIIII daghen dat die voersz pandinghe naden dijckrecht volstanden ware daerna sijn sy als scout ende heemraders van Nyeleckerlant voersz mit des dijcgraven gesworen clerck gedaecht te comen int elshout in sinte Jans ander schouwe int jaer XXVII voer den gemenen dijcheemraders ende hebben den scout ende heemraders voersz by haren ede vermaent Sconenborch voersz te prysen ende te scatten daer die dijcheemraders vanden weert voersz by aenbrenghen vanden scout ende heemraders voersz ende op haren ede Sconenborch voersz geprijst ende gescat hebben elken marghen voer vier Engels nobel comen die drie hoeven voersz hondert ende twe ende tneghentich Engelsce nobelen welke voernoemde Sconenborch mit allen sinen toebehoren voersz die dijcheemraders vanden weert voersz mit vonnisse ende mit allen volcomenden dijcrecht vanden weert voersz den voergenoemden Gherijt Zebaers Wiggherssoen alinge ende al toegeeyghent hebben voer sijn eyghen proper goet voer LXII 12 Engelscen nobelen eenschat gelts als van makynghe des dijcx als voerscr is dat aen vierscatte pande coemt derdalve hondert Engelsce nobelen Voert so hebben die dijcheemraders vanden weert den scout ende heemraders van Nyeleckerlant voersz by haren ede vermaent ende bevolen datsi den voernoemden Gherijt in Sconenborch mit allen sinen toebehoren voersz kennen ende houden sullen voer sijn eygen proper goet als sy gedaen hebben ende doen willen
</main>
<end>
Dat geschiede int jaer XXVII als voersz is
</end>