Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1437_1

<begin>
Uut verdrach vanden scout burghemeesters scepenen rade ouden rade achte ende gemeenen dekens vander neringe soe is verdragen na quader costume ende gewoente die lange tijt geweest heeft binnen Dordt
</begin>
<main>
alsdat voertaen niemant vergaderinge maken en sal van vrouwen alsmen kinderen eerst te korstenheit dragen sal als om daermede te gaen dan diegene die daertoe een wete sal gedaen worden dats te weten dan die gevaders die dat kijnt heffen sullen ende die vrouwe moeder ende daertoe zesse vrouwen tsy vander maechscip of van buersscip ende waert sake dat hier yemant tegens dede het waer van meer vrouwen te vergaderen of dede doen dat waer elcx op een halve roey muer die te maken tot onser stede behoef daermen hem die wysen sal te maken Ende so wie hiermede ghinc meer dan hier voirscr staet dat waer op dier vrouwen huecke ende die soude sheren knaep dan haer rechtevoert ofnemen te wesen Ende des sullen die gevaders die kinderen te pillengave gheven niet meer dan elcx een halve Borgonsche scilde of die waerde daervoer myn ofmen wil elx op 12 roey muer die te doen maken tot onser stede behoef daer men hem die wisen sel te maken
Item waert sake dat yement anders quame worscippen op punten inder crame dan die vrouwen die voerscr staen dat waer elcx op 12 roey muer tot onser stede behoef ende ut supra
Item waert dat yement enige vrouwen vergaderde tegens dat die vrou vanden kinde eerst uutghinghe dan VI vrouwen van maechscippe of van buerscippe ende daertoe die gevaders die dat kijnt geheven hadden ende die vrouwe moeder dat die verbuerde 12 roey muer tot onser stede behoef ende ut supra Ende so wie hier dan meer mittie vrouwe in thuus te comen quame of blijft eten dan die vrouwen die voerscr staen dat waer elcx op 12 roey muer tot onser stede behoef ut supra
</main>
<end>
</end>