Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1438_2

<begin>
</begin>
<main>
Dat nyemant gheenrehande dobbelspull noch pysen en hantier bynnen der stede op X pont ende correxy van scepenen Ende waert datmen tot enygher plaetzen bynnen der stede tot yemants huys bevonde datmen dobbelspul off pysen hantierde als voersz is ende dat kenlic bevonden worde dat waer op X pont ende correxi van scepenen hieroff sal die heer hebben die een helfft ende diet anbrenghen die ander helfft behoudelic jaerlicx te spoelen viertyen nacht voerden groten vastellavondt tot eenen Burgonschen Phs scilde toe te winnen off te verlyesen ende nyet meer
Dat nyemant gheenrehande cedulen off brieven en breng bynnen der stede inder ghilden merghenspraeck buten orloff vanden burghemeisteren ende vanden achten op die boete van X pont ende een ruede mueren ende op correxy van scepenen Ende wie dustanige cedulen off brieven ontfing dat waer op dieselve boeten voerscr Wart gecondicht dat alsulcke X sc Holl daer die stede boden na inhout des koerboeckx daghelicx recht off doen sullen staen so dat overdragen is metten neringhen tot achtalven ouden leeu toe ende van alzo veel salmen voirtan daghelicx recht doen na inhout des koerboecx ende hyeroff salmen den boden geven eenen halven ouden leeu
Dat nyement binnen der stede scoel en houd van knechtgens die ter groter prochy horen anders dan in die grote scoel tenzy by orloff vanden rectoer uutgesette die haer ghetall leeren ende daerbeneden op III pont ende correxy van scepenen Ende waert dat enighe kinderen die in anderen byscolen scriven off leeren tot enigher tijdt quamen voer die grote scoel opten groten kerckhoff ende daer enighe onstandt bedreven ontamelic die sal die rector in moghen halen ende corrigeeren die redelic als hi daghelicx sijn scoeliers doet sonder tegens yement daeran te misdoen ende waert dat yement hyerom hem misdede off misseyde off dede missdoen off misseggen ende dat claerlic bevonden worde dat zoudmen also corrigeren dats hem altijt een ander soude moghen wachten
</main>
<end>
</end>