Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1439_1

<begin>
</begin>
<main>
Wart gheboden zo wat recht off uutspraeck byden waterscepenen vanden waterrecht ghewijst off mits gheblijff van beyden partyen uutghesproken sal worden dat dat sal van waerden wesen ende dat salmen also houden ende voldoen bynnen den dorden daghe op die boete van X ponden ende correxy van scepenen Ende wes die waterscepenen by tyden wysen off mits gheblijff van beyden partijen uutspreken dat vanden waterrecht roert ende dat draecht an I pont gr of daerboven daeroff sullen zy hebben een quartier van eenen Enghelschen nobel ende wes daerbeneden draecht daeroff sullen zy hebben een halff quartier dengheenen off te nemen die inden onrecht bewijst wordt ende den partyen mits gheblijff so dat uutghesproken sal worden Datt nyemant voertan zijn huysen tot gheenen stede tarpoeyzen en sal op X pont ende correxy van scepenen So wes gueden byden gheenen die die besterffte vander stede weghe ghehuert heeft toebezegelt worden datmen die nyet opdoen en sal tenzy by consent vanden burghemeester ende wes guet vander besterffte roerende byden huerman beset wort dat nyemant hem dat en ontvuer noch en ontvremde op III pont ende correxy van scepenen
</main>
<end>
</end>