Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1439_2

<begin>
</begin>
<main>
So die goede lude vernemen dat die torven binnen Zuythollant gedolven vast wechgevoert worden boven die gebode voirtijts dairop geboden ende dairom die torven opslaen ende gelden boven redene so ist dat die goede lude die gebode voirtijts daeroff gedaen nu vernyewen ende gebieden dat nyemant gheen torven binnen Zuythollant gedolven en voere buten Zuythollant doir enige gaten inden dijck gelegen noch nergent anders ter merct en brenge noch en vercope noch en slyte dan binnen onser stede op tscip ende torff verbuert te wesen dairoff te hebben die heer een dordendeel die stede een dordendeel ende die gesellen diet aenhaelden een dordendeel Item so wat scepe mit torven geladen quamen varen tusschen Wyelensteyn ende Werckendam dat scip ende torve waren verbuert ende dat te gaen als voirsz staet
Item so wat scepe mit torven geladen diemen vint leggende off varende binnen den reep vanden groten waert ende Tordrecht ter marct niet geweest en hebben die scepe mitten torven waren verbuert te gaen als voirsz is behoudeliken die composicie tusschen onsere stede ende der stede van Gorinchem gemaect in waerden te houden ende te bliven
Voirt gebieden die goede lude dat nyemant tusschen nu ende sinte Nycolausdach geen torven uter stede en voere op die verbuernisse voirsz behoudelike der composicie voirnoemt
</main>
<end>
</end>