Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1440_1

<begin>
</begin>
<main>
So die stadt van Colen hier ghescreven heefft van groten ghebreke die gevallen is inden zoudt daer die ghemeen lude groten schade by hebben ende oick hyer inden lande veel gebrecx daerin bevonden is om hyerin te voersien ende die gebreecke te verhueden ende een yghelic hyerin te waerscuwen so is geboden byden goeden luden vander stede dat nyement wie hy zy after Beloken Paesschen naestcomende geenrehande zoudt hyerbynnen en breng om voert te vercopen hy en breng daeroff zeker schijn ende bethoen mit bezegelde brieve vander stede daer hy dien zoudt geladen heeft wat zout dattet zy weder grauw zellzoudt of roet zellzoudt off aschzoudt off clijnzoudt off zoudt van zoudt ende hoeveel dattszy Ende dat nyement geen tweerhande zoudt en breng in een scip mer elc zal brengen eenrehande zoudt ende dat ongemenct laten op die boete van een roede mueren Ende dat nyement voertan geenrehande zoudt opwaert en vuere hy en come eerst voerden burghemeester scepenen ende raedt ende thoen daeroff sulke schijn ende bethoen vanwaer hijdt geladen heeft ende wat zoudt dattet zy so voerscreven staet ende daertoe sal hy zynen eedt doen dat hy dat zoudt nyet gemeynct en heefft vander tyde dat hijdt ontfangen ende in zijn scipp geweest heefft ende daerof sal hy dan nemen onser stede bezegelde brieff op die boete so voerscreven staet
</main>
<end>
</end>