Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1460_1

<begin>
</begin>
<main>
Also inden jair LX opten XXVIII dach in Junio is gecomen inder camer voirden burghemeyster ende gueden luden vanden gerechte Airntken Gijsbr Ackermans dochter out omtrent XV jaren mit Gijsbr voirsz hair vader ende hair moeder ende heeft aldair clagelijck mit schreyende ogen te kennen gegeven hoe dat opten Manendach lestleden voir des heyligen Sacramentsdach een geheeten Andries Andriessoen aldair tegenwoirdich wesende ende ontboden hair maechdelyke reynicheyt crachtelijck tegens haren danck ende wille genomen soude hebben ende begeerde dat vanden scout ende gueden luden vander stede gerecht te hebben als dat behoirt Daerop Andries voirsz vermaent wordt wat hy daerop seyde Dietwelcke Andries voirscr dat geheel ende all missaect heeft Ende hierop so sijn sy op beyden syden voirsz te weten Airntken Gijsbr dochter voirsz ter eenre ende Andries Andriessoen voirsz ter ander zyde gevangen en ende inder stede gevangenisse geleyt tegens malcander om hi erin te doen mitten recht als dat behoren soude Ende want ter begeerte van beyden zyden voirn hierop hem beyden een dach van recht beteykent was ende sy te samen inder vyerschair gecomen waren die een den anderen te weten Airntken vooirsz heeft aengesproken by haren voerspraeck Andries voirn in alle manieren voirsz gelijck sy gedaen had inder kamer ende mede altijt inder vangenisse wesende Dairop Andries voirsz by synen voirspraeck sijn onschult gedaen heeft ende al ende geheel versaect gelijck hy voir gedaen had Ende so scepenen ende rade hierop getuygen ende wairheyt ter begeerte van beyden zyden ende haren vrienden gehoirt hebben ende die guede luden die voirsz saeck niet claerlick bevonden en hebben by getugenisse die dairoff gehoirt was so dat wel behoirde indyen men Andries voirscr an sijn lijf comen soude dairom so hebben die guede luden den iersten dach van recht voirn XIIII dagen verlenget om dairenbinnen beter bescheyt dairof te vernemen Ende hierom enige guede personen anden gueden luden duechdelijck ende oetmoedelijck vervolcht hebben so dese saeck in hair selven zeer zwair wair ende het wel behoirde in allen dat den lijff aenginc alle saken het wair by getugenisse off by belyinge openbaer te wesen door God ende alle guet te willen laten guedertierenlick havenen om een yegelijck genade ende niet dat scerpste recht in desen te hantieren Dairop die guede luden die vrienden van beyden zyden gehoert hebben die gemeenlick an beyden zyden dairtoe geneycht waren Ende hierom mits van dengenen die anden gueden luden als voirsz is oetmoedelijck vervolchden so hebben sy mit den vrienden van beyden zyden voirsz by consent van Airntken ende Andries voirn die dat selver mede begeert hebben oetmoedelijck begeert anden scout ende gueden luden vanden gerecht datmen alle dat krimeneel in [dyen] 1 dair yet in wair inder selver sake woude afflaten doot ende te nyet ende dat civyel wair te beteren byden gueden luden vanden gerecht gelijck dat denselven gueden luden na alle gelegentheyt der sake guetduncken sal Ende so die scout ende guede lunden vanden gerecht altijt geneycht sijn tot goedertyerenheyt ende niet tot den scherpsten recht so hebben die schout ende guede luden voirn ter begeerte van hem allen voirsz dese saeck inder manieren voirn belyefft ende geconsenteert Ende hierom na tuyge ende waerheyt ende na all dat die guede luden inder sake voirsz bevonden hebben mits geblijff vanden heer ende pertyen voirn so sall Andries voirsz Gode ter eeren den heer ende der stede te betering doen maken een roede mueren dairmen hem die wysen sall off dairvoir te betalen LIIII Burgoensche sch die mueren te doen maken off tgelt te betalen tusschen hier ende korssavont naestcomende by daechs licht te verborgen etc optie boet van LX pont entie nyeu koer Ende so Airntken voirsz dese saeck voirsz niet bijgebracht en heefft nader stede recht als dat behoirt ende Andries voirsz die altijt versaect heeft so sal Airntken voirsz dairvoir Gode ter eeren den heer ende der stede te betering betalen X m steens infr hinc et nativit Chr by daechs licht te verborgen optie boet van LX pont entie nyeu koer Ende dese correcty sall gaen daer die guede luden die keeren sullen
</main>
<end>
</end>