Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1460_2

<begin>
</begin>
<main>
Int jair LX vijff dage in Julio die scout vander stede als van tsheren wegen overmits anbrengen ende vlichtmaren die hem angebracht waren so hy seide heeft Jacop Janszoen die vleyschouder angesproken hem anseggende voir burghemeisteren scepenen ende raet ende voert mede voir die guede lude vanden achten dat hy so ontamelic strengelic ende wredelic mit Swanen Jansdochter synen wive was geleefft hadde onlancx voir haren doot ende eer sy siect wart te weten dat hyse geslagen ende gesteken hadde wairom sy van sijnder hant ende by mesbruck van hem gestorven ware ende niet anders seggende dat hy dairan gebreuct hadde van boet ende correxcy alsoe groet ende cleyn als scepenen wisen souden dat recht wair ende vermaende dairop dat vonnes begerende datmen alsulke getugen als hy van tsheren wegen ontboden hadde tot synen behulp hoiren wilde by hoeren eede als dat behoirt ende wat hemluden vander voirsz saeken die hy Jacop Jansz anseggende was condich ware begerende dairenteinden uutinge des voirsz vonnes by hem vermaent Dairtegens Jacop Jansz voirsz mit synen vrienden ende magen int cort op gheantwort heeft seggende dat hy alle anlech ende anspraeck op hem byden scout gedaen vander voirsz saiken all ende geheellic ontschuldich wair hem well getroestende die guede waerheit ende alle getugenisse die dairoff over hem gaen mochten dairna hem dragende ant guede recht ende begerende mede uutinge des voirsz vonnes tot sijnder ontschult ende ontlastinge Die scout van tsheren wegen ter eender siden ende Jacop Jansz voirsz mit syne vrienden ende magen ter ander siden gehoirt in all tgont dat sy hebben willen seggen ende voirtbrengen elc tot synen behulp ende meyninge dienende dairna so sijn beide partien voirsz uyt heyten gaen ende die burghemeister scepenen ende raet hebben alle die getugen die die scout als van tsheren wegen hadde doen dagen tot synen behulp zeer naerstelic ende scarpelic ondersoecht bevraecht ende vermaent nadat sy ten heyligen gesworen hadden die gerechte wairheit vanden voirsz saken te seggen Welke saiken also gedaen ende die getuge int lang gehoert ende well examineert so is die scout ter eender siden ende Jacop Jansz voirsz mit synen vrienden ende magen ter ander siden weder ingeropen Dair die scout voirsz van tsheren wegen so voirsz is weder den scepenen dat vonnes vander saike ende anlegge voirsz vermaende sodat die scepenen dair well ende wyselic op beraden hebben gewijst mit vollen vonnes ende mit allen recht na getuge ende waerheit ende na allen ondersoeke dat sy op dese saiken gedaen hebben dat Jacop Jansz voirsz vanden anlegge ende anspraeck des scouten voirsz ende van all datmen hem van deser saiken anleggen ende betichten will sall quijt ledich ende vry sijn tot ewigen dagen so hy niet anders mit Zwanen Jansdochter Jansdochter sinen wive was voirsz geleeft en heeft dan een guet man mit sinen wive schuldich is te leven na getugenes die dairaff gehoirt is Ende dit was bevolen hierin te teykenen op den dach voirsz
voirsz
</main>
<end>
</end>