Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1461_1

<begin>
In den jair LXI opten anderen dach in Septembri so sijn die gemeen dekens vander ses scipluden gilde gecomen inder camer ende hebben aldaer den scout den burgemeyster ende den gueden luden vanden gherechte ende vanden achten gemeenlic te kennen gegeven
</begin>
<main>
hoedat inden jair ses ende viertich een zeker ordinancy gemaect is hoemen poirters in enige gilden en ambachten ontfangen sal gelijc dairof die koer inhout ende begrijpt ende niet meer te ontfangen dan dair begrepen staet mer myn of den gildebroeders belieft te weten een ingeboren poirter off die poirtrecht behylict heefft om twee nobelen een die bynnen Hollant of Zeelant buten Zuythollant geboren is om drie nobelen ende die buten Hollant ende Zeelant geboren is om vijf nobelen ende elck gilde mach myn nemen oft hem geliefft ende niet meer dan voirsz is optie boet van LX pont ende vijf roede mueren So begeerden sy van haren gemeen gildebroeders wegen voirnoemt oetmoedelic aenden gueden luden voirnoemt in desen te voirsien ende also verre als des mogelic wair te verhoeden dat sy niet al neringloos en worden ende hebben dairom vorder gemeenlic begeert dat denselven gueden luden voirsz believen wil dat voirtaen in kueren geleit worde dat geen poirter en soude ontfangen worden in enige vander scipluder gilde voirsz te weten nader nyer koor hy en soude geven voir elken nobel diemen in anderen gilde gevet hetsy van bynnen of van buyten een gouden leeuwe ende dat gelt soude bliven alleen in dat gilde dair hy ontfangen wair behoudelic dat die gildebroeder van sinen dekens niet en soude geeedt worden hy en hadde ierst sijn gelt geheel ende al betaelt sonder enige argelist ende die dekens en hadden een guet litteyken vanden burgemeyster by tyden wesende dat die gildebroeder poirter ontfangen wair Ende want die guede luden vanden gerecht ende vanden achten altijt geneycht sijn alle gilden te helpen onderhouden in neringen ende welvaren so hebben dieselve guede luden voirscr die selve koer inder manieren voirnoemt bellieft ende geconsenteert also die koir niet en is contrary der eerster ordinancy ende om die te onderhouden so is vorder dairop verdragen ende gesloten by hem allen voirnoemt dat voirtaen tot allen tyden alsmen enige dekens in enigen vanden ses gilden voirnoemt gecoren sall hebben datmen die int openbair voirden gemeenen gildebroeders sal eeden by een van des heren knechten dat hy die voirsz koer altijt sal houden van wairden ende doen sijn gemeen gildebroeders guede rekeninge vanden gelde voirsz sonder eenige quijtsceldingc dairof te laten gescien in eniger wijs Ende wairt sake dat yemant vanden dekens voirsz tot eniger tijt niet en dede als voirsz staet daeraen soude een yegelic vanden dekens die contrary deden of dat beliefden verboren vijf pont ende duysent steens tot behoeff der groter kerck terstont sonder enich verdrach te betalen als dicke ende menichwerff als dit kenlic bevonden worden gesciet te sijn Ende dit hebben die gemeen dekens vander scipluden gilden voirsz begeert aenden gueden luden voirnoemt over hem te kennen bevolen inder stede register te teykenen
</main>
<end>
</end>