Lijst

Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1462_1

<begin>
</begin>
<main>
Int jair LXII opten XVII dach in Julio heeft Jan Gerijtssoen inder camer voir die guede luden vander stede versocht ende begeert van joncfrou Mary Gerijt Jansoens wedue sijnre moeder te hebben guede rekeninge ende bewysinge van sijns vaders bestorfte te weten van zekeren gelde cleynoten juwelen ende sculden dair aen hem bedeelt was by doode sijns vaders voirsz ende die sijn moeder voirnoemt weder als voecht van hem onder hair genomen hadde Dairop van sijns moeders wegen by Bouden van Roede sijn oem ende in joncfrou Mary voirsz naem uut haren bevele geantwort was dat voirsz joncfrou Mary voirsz hem guede rekeninge ende bewysinge van al dat voirsz is gedaen had ende dairof wair een guede scepenen quitancy ende quijtsceldinge van jan hair soen voirsz verleden inden jair LV XXI dage in Decembry wairby dat sy vander aenspraeck ende eysch voirnoemt soude wesen vry quijt ende ontslagen van jan hair soen voirsz ende bedingde ende begeerde dairop een vonnisse van scepenen Dairop Jan voirsz weder antwoirde dat hy kende dat hy sijnre moeder voirsz een quijtsceldinge als voirsz staet gedaen hadde ten dage voirnoemt mer ter selver tijt ende voir dieselve scepenen so hadde sijn moeder voirsz hem ierst belijt een vryen coep vander helft vander geheel huysinge mit haren toebehoren die sijn vader bewoende ende toebehoirde int lest van sinen levenden live dairof begerende van sijnre moeder te hebben die scepenenbrieff vanden coep voirnoemt also die verleden was als voirsz staet Hierop so is dat vonnisse van scepenen by vermaninge vanden scout gevat ende dat gestact ten dage hierna gescreven ende beyde zyden voirsz bevolen ten selven dage inder camer den gueden luden te brengen een ygelic alsulke brieve getuych ende anders dair hy hem mede behelpen woude opdat die guede luden een ygelic mochten recht doen So ist dat dairop opten vijfsten dach van Augusto mit vollen vonnisse voir recht gewijst [is] 1 van scepenen dat na woirde ende wederwoirde na tuych ende wairheyt die scepenen ende raet dairof gesien ende gehoirt hebben ende na alre bedincter talen die coep vander halver huysinge mit haren toebehoren voirnoemt die joncfrou Mary voirsz haren soen voirnoemt vercoft heefft sal wesen ende bliven van wairden gelijc die quitancy ende quijtsceldinge die jan voirsz sijnre moeder voirsz gedaen heeft als recht is naden recht vander stede Terstont so wort bevolen Bouden van Roede voirsz inder camer inden naem van joncfrou Mary sijnre suster voirsz jan Gerijtssoen voirnoemt sijn neve te geven den scepenenbrief vanden coep voirnoemt ende indien des jan voirsz niet en gebuerde so souden die guede luden vander stede denselven jan by anderen wege dairtoe dienende helpen tot gueder ende behoirliker kennisse vanden selven coep voirsz Ende dit wort bevolen hierin te teykenen
Inden selven jair voirsz opten sestiensten dach in Augusto is Jan Gerijtssoen voirsz weder inder camer gecomen ende heeft aldair te kennen gegeven hoe dat hy van sijnre moeder alsulc brief vanden coep vander halver huysinge als sy hem vercoft hadde gelijc hierboven gescreven staet niet en mochte vercrigen hoewel hy des versocht hadde begerende dairom bewairt te wesen inden coep voirsz gelijc hem geloeft is als boven verclairt staet So is hierop vorder gesceyden dat Jan voirsz mitten vonnis hierboven geteyhent sal bliven inden eygen vander halver huysinge voirsz in alre manieren ende gelijc of hy den coepbrief die dairof van sijnre moeder voirnoemt verleden is als voirsz staet hadde guet gans gave ende oncancelleert in sijn handen Ende dit wort bevolen hierin te teykenen
teykenen
</main>
<end>
</end>