Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1467_1

<begin>
Wy schout burgemeester schepen ende raedt outraidt achte ende dekens vanden gemeenen neeringen der stede van Dordrecht doen condt allen luyden
</begin>
<main>
dat opten datum van deesen brieve byden gemeenen neeringen voorsz uuyt allen mergenspraken aengebrocht gesloten ende verdragen is in presentie van ons allen voornoemt dat alle degeene die tot deesen dage toe gecorrigeert sijn of hem selven verwillecoort hebben oft met brieven uyt der stede sijn bevolen te gaen in wat manieren dattet geschiedt mach wesen alsoe wel jan Oem ende Claes Loynck als alle andere weder sy binnen oft buyten der steede sijn sullen van aller correxie ende verbanden weder sy verborcht sijn oft en sijn in wat manieren dattet zy volcomen gratie ende quijtscheldinge hebben van allen onbetaelden gelde ende correctien Ende alle diegeene die uuyt gezworen dienst uuyt gezwooren gerecht oft uuyt vergaderinge geset sijn geweest sullen weederomme dairof vry weesen ende in gezwooren recht ende dienst ende vergaderinge coomen uuytgeseyt vanden vijf poincten ende behoudelick den heer sijns rechts ende den banbrief ende dat keurbouck altijt in allen poincten in hair macht ende waerde te blyven Voorts de laetste cleppinge als van nyemant eenige poincten in eenige vergaderinge te openen tenzy dat die eerst byder goede luyden vander stede geopent waren sal geheel ende al doot ende te nyet weesen Voort alle woorden werck ende twist dat tot deesen dage toe geschiet sijn van wyen datse geschien moegen weesen uuytgeseyt quetsinge dootslach ende dat dairaen cleeft sullen geheel ende al vergeven weesen ende men sal dairof nyemant hier naemaels om belasten in geenre maniere behoudelick altoos den heer sijns rechts Voirt soe sal een yegelick in sijnre mergenspraecke ende oeck ten Broeders inder vergaderinge vry mogen spreecken ende soe wes woorden oft twist aldair geboerde van yemant uutgeseyt vechtelich mestreckinge ofte diergelijck dat salmen elcxs afleggen ende berechten aldair de twist ende woorden geboerden ende nergens anders behoudelick den heer altijt sijns rechts Ende wes last dat der stede of yemande tot eenigen tyde namaels hyeraf opcomen mocht sullen wy al te zamen te weeten schout burgemeester schepenen raedt outraedt achte gemeene dekens ende alle die alinge gemeente gelijck malcanderen vry [te] helpen dragen ende nyemande bysonder daerof belasten maer sal onser alre stuck weesen Ende alle voorsz poincten deuchdelick te onderhouden opte boete van thien roede mueren
</main>
<end>
Ende des toirconde soe hebben wy altesamen soe wy voirsz staen deesen brieve met der steede zeegel ten saecke uuythangende bezegelt ende onder elck vanden XII tresoriën een geleyt Gegeven opten dach inde maent van Aprille int jaer ons Heeren duyseia vierhondert zeven ende tzestich bynnen der sloe van haren huyse ende niet dairover dan optie boet van III pont ende correcty van scepenen also dick als dat bekonden worde
</end>