Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1484_1

<begin>
</begin>
<main>
Die 9e Julii Joost Meus van Heerjansdam omdat hy ontboden is gheweest wanden baeliu van Zuythollant om bedracht te doen tusschen partyen ende ghezworen heeft lieflijck then heyligen te recht bedracht te doen als dat behoert ende die bedracht die aldaer by hem ghedaen wert ondoechdelijck ende onrechtelijck bevonden is gheweest twelck hy well bet wetende ghedaen heeft ende noch hierboven lieflijck then heyligen ghesworen heeft vanden voerscr eedt te recht te staen ende zynen rechtdach daeroff waer te nemen ende bynnen der stede te comen ende daar nyet nut te sceyden ten waer dat zynen rechtdach gheeyndt waer off by oerloff ende consent vanden schout twelck hy alzoe nyet ghedaen en heeft ende nyet bynnen ghecomen is na belyden dat hy hem selven voer scepenen ende raedt beleden heeft na tuych ende waerheyt die scepenen ende raedt daeroff ghehoert hebben so sall hy daervoer Gode ter eren den heer ende der stede te beteringhe een uur opte kaeck staen ende sall daerboven after tavont uut die stede van Dordrecht ende after morghen avont uut Zuythollant ghebannen wesen drie jaer opte buet van LX pont ende die nyeu kuer
</main>
<end>
</end>