Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1486_2

<begin>
</begin>
<main>
Alsoe joncfrou Johanna van Woude ende van Wormont in geenre wijs mit redelicke ende goede betalinge the vernugen en is van horen verschenen renthen alsmen allen anderen tot desen dage toe van horen renthen betaelt ende vernuecht heeft ende overmits dien deser stede poertteren tot Brouwershaven tot Breda ende anderen plaetsen groettelic gequelt ende gemolesteert heeft tot horen groeten afterdeel ende scade ende alnoch dat nyet laten en soude indien zy yemant vanden poorteren voirsz bevinden conde soe vercondigen daerom die guede luyden ende waerscuwen enen yegelicke vanden poorteren dat zy wel voir hem sien ende hem wachten bysonder nyet te trecken tot Breda aldair die voirsz joncfrou leggende is hy en reyse op sijns selfs geleyde want by alsoe aldair van yemant becommert worde die goede luyden en sullen dairoff geen versett doen
</main>
<end>
</end>