Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1487_1

<begin>
</begin>
<main>
Item alzo oick overmits grote gebreken die daer schuelen ende dagelicx gehantiert worden onder ende van dengenen die geen poorters en sijn ende alhier dagelicx poortersneringe doen ende alhier huys ende hoir haertstede houden ende dagelicx die vryheit vander stede gebruycken nyet gevende contribuerende off last hebbende als andere inwonende poorteren twelck een onbehoirlic ende onredelic stuck is ende contrary der stede koer is so vercondigen die guede luyden vander stede achtervolgende tselve verdrach dat dairoff by gemeenen raide ende mergensprake verdragen ende gesloten is dat alle diegeen die hierbynnen woenachtich sijn die en sullen hier geenrehande neringen mogen doen zy en sullen eerst ende allvoren poorters ende giltbroeders wesen op alsulcke boeten alst koerboeck dairoff verwijst ende alzo lange als zy geen poorters off giltbroeders en sijn zo sullen zy geven van elck vat biers des tappers excijs ende dairtoe sullen zy waken gelden ende geven ende doen in allen stucken als andere poorters ende en sullen nochtans deser stede vryheyden nyet genyeten
</main>
<end>
</end>