Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1487_2

<begin>
</begin>
<main>
Alzo ter kennisse vanden gueden luyden gecomen is dat een nieugeboren kint God betert verdaen ende in die haven geworpen is dairop van groten noode is ten exempell van allen anderen voirsien te wesen soe hebben die guede luyden vander stede om dairtoe te comen ende te mogen weten by wie dat overdaet geschiet is geordineert zekeren goevrouwen om te gaen tot allen huysen bynnen deser stede zowel in die achterstraten als an die voerstraten gebiedende hierom die guede luyden dat alle vrouwen van wat state condicie off hoedanich zy sijn van stonden aen gaen bynnen horen huyse daer zy woenachtich sijn mit hoir joncwyven ende allen anderen vrouwenpersonen die van haren huysgesin sijn ende uut horen huyse nyet en scheyden voirdat die goevrouwen die aldus byden gueden luyden dairtoe geordineert sijn aldair bynnen horen huyse geweest ende na dit werck ondersocht ende gevraecht sullen hebben ende dat oick nyemant hy zy goet off quaet denselven goevrouwen off dengenen die met hem vander stede wegen comen sullen en misdoen off en misseggen mer denselven hare huysen cameren ende sloten opdoen ende gevuechlic laten ondersuecken ende al doen dat hem byden selven gevercht ende offgevraecht zell worden by eede ofte anders op correctie van scepenen ende dat te corrigeren tot enen anderen ewich exempell
</main>
<end>
</end>