Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1509_1

<begin>
</begin>
<main>
1. Om een yegelicken hem selven te moghen wachten voer die huyssen daer by tyden die haestighe sieckte ende pestilencie coemt soe gebieden die goeden luyden vander stede dat alle dieghene wie sy zijn daer die haestige zieckte inden huysse coemt dat zy dat van stonden aen haer gebueren ende vrienden te kennen gheven ende uutbrenghen opdat dieghene die daer uut ende ingaen daerdoer gewaerscuwet worden optie boete van drie pont ende correxie van scepenen
2. Item dat een yeghelike uutten huysse daer die haestighe sieckte in is terstont een boss stroys uuthanghen sall ende die sall daer blyven hangen ses weeken naedat die leste doode uutten huysse gedragen is ende en sullen gheen neringen off ambochten inden voorscr huyssen doen noch gheene cleederen uutten voorscr huysse tot gheenen plaetsen uuthanghen binnen die eerste ses weken optie boete van III pont ende correxie van scepenen
3. Item dat alle mannen ofte vrouwen die over die ziecken voerscr gaen sullen hebben openbaerlick een wit stoxkijn in haer hant een ellen lanck wesende als sy byder straten gaen ende en sullen in gheenen anderen huyssen gaen daer die haestige sieckte nyet in en is ende zullen hem selven houden uutten volcke hetzy opter straten inde kercken off in die sermoenen den tijt van ses weeken optie boet van 111 pont
4. Ende van gelijcken zullen oeck doen allen mannen off vrouwen die de sterffhuyssen bewaren off daer uut ende ingaen
5. Item noch gebieden die guede luyden vander stede dat allen dieghene die over die voerscr siecken gaen dat zy in gheenen prochiekercken ofte cloosteren ter kercken en gaen noch en comen mer sullen die cellebroeders ende graususteren blyven elcx in hoer eygen kercke ende allen die anderen sullen te kercken gaen ende misse horen in die Ploechcapelle after int Vriesenstraet optie boete van drie pont ende correxie van scepenen
6. Item datmen gheen goeden inden huyssen daer die sterfft in is rippen noch roeren en sall noch dat huys nyet open setten binnen die eerste ses weken maer sullen die huyssen vieren met beslotender doeren opte boet van drie pont
7. Item dat gheen mans daer die sterfft int huys is off die inden sterffhuysse daer yemant haestelick gestorven is in off uutgaet off dat bewaert en sullen binnen acht weken daerna nyet waken opter salen noch an die mueren om ghelt voer hem selven off voer yemant anders op die boete van drie pont
8. Item dat die barbiers dat bloet dat zy uutten luyden laten nyet en zullen ghieten in die haven off in die graften maer sullen dat in putten graven onder der aerden optie boete van drie pont
</main>
<end>
</end>