Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1509_2

<begin>
</begin>
<main>
1. Alsoe men een Sonnedage naestcomende ter eere Goods ende tot waerdicheyt des heyligen Sacraments eenen ommeganck ende processie om die stede houden ende gaen sall metten heyligen sacrament uutten gasthuysse ther gedenckenisse vanden groeten mirakell dat geschiede anden heyligen sacrament inden groten brande soe gebieden die guede luyden vander stede dat alle ghilden hoer behoirlicken toertse bereyt hebben ende inder processie voirscr brenghen ende doen draghen by goeden eerlicken mannen in goeden habite ende cleederen gaende ende gheen kijnderen optie boete van drie pont terstont tot die dekenen huysen off te halen ende dat dieghene die by hairen dekens daertoe geordineert sullen worden die toertsen te dragen dat zy hem dat nyet en weygeren opte selve boete voerscr ende correxie van scepenen
2. Item gebieden die guede luyden vander stede dat nyemant wie hy zy pelgerim ofte andere en gae inder processie tusschen den heyligen sacrament ende die priesteren ende clercken dan alleen die de toertsen vanden gilden wege sullen dragen optie boete van III pont
3. Item dat nyemant die processie en volghe voerdat die ghildebroederen ende susteren vanden heyligen sacramente hoer ordinancie hebben ende den dienres inder processie nyet lastich ofte rebell en zijn met eenigen dreygementen ofte woerden optie boete van drie pont
4. Item gebieden die guede luyden dat nyemant mit plattynen en gae onder den pelgerims die barvoets gaen sullen daer sy die pelgerims mede quetzen mogen optie boete van drie pont
5. Item dese processie sall uutgaen alsmen die groete clock luyden sall ende opdat een yegelijck alhier te vryer comen mach soe geven die schout bourgemeesters ende die guede luyden vanden gerechte allen denghenen die hier comen sullen een guet vry vast geleyde gelijckerwijs oft inde vrye jaermarckt waer geduerende van Saterdaechs ter sonnen opganck tot Dinxdaechs oeck ter sonnen opganck toe
6. Item gebieden die guede luyden dat gheen vreemdt man harnass pansser zutselaers noch wapen en draghe optie boet van III pont ende tharnass pansser ende wapen verboert
7. Item dat nyemant vanden duvels ofte anderen die hem mede inden spull sullen schicken te wesen eenige ontamelicke woerden off onzedicheyt inden ommeganck en hantieren mer betamelick hem voegen tselve te doen dat hem geboert ende daer zy toe geschickt sullen weesen byden meesters vanden spell ende dat zy oick nyemant ghelt off en scatten noch inder luyden huysse en gaen om yemant ghelt off te scatten optie boet van III pont
8. Item dat alle diegheen die eenige paerden hebben daer zy dagelicx haer broet byder straten mede winnen dat zy elcx hoer paerden brengen een Sonnendage naestcomende smorgens tot sess uren opt tgroet kerckhoff byden meesters vanden speell om die toirbaeren daerse die speelmeesters toe ordineren sullen ende dat oick nyemant zijn paerden te voren uutter stede en voere noch en doe voeren ende wyese uutgevoert heeft dat hyse weder hale ende brenghe then dage ende ure voernoemt opt tgroete kerckhoff optie boete van een jaer lanck broett noch gelt binnen der stede daermede te wynnen ende correxie van scepenen
9. Item dat alle dieghenen die eenich spull angenomen hebben uut te brengen dat zy dat uutbrengen als dat behoert optie boete van III pont 10 Item dat alle die groete gilden vier mannen ende die cleyn ghilden twee mannen uut haeren ghilde schicken sullen tot acht uren opt tgroet kerckhoff byden speel naden ouden haercomen optie boete van III pont
11. Item dat alle diegheene die eenich spull uutgebrocht sullen hebben dat die stede toebehoert dat zy dat wederom brengen binnen den derden dage onder den meestere vanden speell optie boete van III pont ende gecorrigeert te wesen als van simpelen saken Item des gont die heer den speelmeisters dat derdendeell vanden buetten voerscr
12. Item gebieden die guede luyden dat een yegelick voer sijn huys zijn straten ruym ende schoenmake tusschen dit ende morgen avont opdat die processie ende ommeganck daer nyet by belet en worde optie boete van III pont
</main>
<end>
</end>