Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1517_1

<begin>
</begin>
<main>
Int jaer XVe ende seventhiene opten elfsten dach in Septembri die schout bourgemeester scepenen ende raedt der stede van Dordrecht gehoert hebbende hoedat een schipper genaemt Zybrant Talixz van Amstelredam hem vervorderd had met een schip te comen uut Oestlant van Hamburch met Hamburgen bier die Maes in ende tselve schip te voeren tot Rotterdam in die haven ende sijn last aldair gebroecken contrary trecht ende die previlegie vander Maess hebben tot conservatien vanden voirsz previlegien uut die haven van Rotterdam tvoirsz schip doen halen ende binnen Dordrecht voersz gebracht ende binnen der stede gebrocht sijnde ende Cornelis Jacopsz van Amstelredam reeder vanden voersz scepe gehoert hebbende dat tschip aldus angehaelt was is gecomen byden bourgemeester Pieter Damasz begerende te voldoen trecht vander Maesse ende mitsdien sijn schip ontslegen te hebben Waerop hem die bourgemeester voersz seyde dat hy comen soude binnen die camer van Dordrecht ende geven aldair sijn begeerte te kennen die goede luyden vanden gerecht so aftervolgende dien die voirsz Cornelis Jacops opten XVIe dach derselve maent voirsz gecompareert voirden gerechte voirsz begerende sijn schip mitten bier ontslegen te hebben mits dat hy presenteerde te betalen ende te voldoen trecht vander Maess welck hy alzoe dede ende dairop ontslegen was
</main>
<end>
Ende dit wort bevolen inder stede re gyster te teykenen
</end>