Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1517_2

<begin>
</begin>
<main>
Op huyden den XXXsten Novembri anno XVe seventhiene is gecompareert inder camer van Dordrecht in presentie vanden gueden luyden vanden gerechte vanden ouden raedt ende vanden achten aldair collegialiter vergadert zijnde Pieter IJsbrantsz Stam scipper van Rarop te kennen gevende hoe dat hy mit zijn schip geladen mit coopmansguet gecomen was uutter zee tot binnen tgat vander Maze ende by onwetenheit oft onacxaemheit van synen styerman ist voirscr schip gevuert omtrent der stede van Rotterdam aldair hy sijn last wesende int voirscr scip niet en zoude willen ofte doeren breecken ten wair dat hy teerst mitten voirscr schip geladen mit zijnre volle last geweest hadde voir de stede van Dordrecht ende aldair volbrocht tgeen dat hy naden rechte previlegyen ende costuymen der voirsz stede schuldich wair van doen ende alsoe overmits desen tegenwoirdigen vorst hem nyet mogelijcken en was tvorsz schip mit synen vollen last voir de stede van Dordrecht te brengen ende hy oick behuefde tvoirsz schip te berghen ende te versekeren voirden ijsganck twelc hem desgelijcx niet mogelijck en was van doen dan mits ontladen tvoersz schip soe heeft hy gebeden ende versocht dat myne heren van Dordrecht daer vergadert sijnde als vorsz is gemerct tgunt dat voirscr is hem consenteren ende accorderen wilden dat hy tsorsz schip ontladen mochte mits dat hy beloven zoude dat alle tguent dat uuttet vorsz schip genomen soude worden eerst tot Dordrecht gebrocht zoude worden all eerment yewers elders soude mogen bergen ofte vueren ende dat hy voort tvorsz schip mittet surplus vanden gueden dat dair noch in bliven soude off ten minsten tleege schip in tyden van oepen water ende aleer hy de Maze weder uut zal mogen varen gehouden zoude wezen voir de stede van Dordrecht te brengen ende aldair te voldoen trecht vander voirsz stede in alre manieren oft voirsz schip mit zijn volle last voir de vorsz stede gecomen hadde Gehoort welc verzueck soe is byden goeden luyden vanden gerechte ende den raidt ende achten aldair vergadert zijnde als vorsz is na rype deliberatie daerup gehadt den voirsz Pieter IJsbrantsz schipper geconsenteert tgeen dat hy versocht ende beghoert heeft in alsulcker forme ende manieren als hiervoren verhaelt staet mits dat hy gehouden soude wesen guede borghen te stellen tgunt hiervoren verclaert staet te volcomen ende tonderhouden ende dit gemerct de gelegenheit van desen tegenwoirdigen tijt ende voir dese reyse alleenlijch sonder prejuditie van trecht vander vorsz stede in toecomenden tyden Ende navolgende desen soe heeft de voirsz Pieter IJsbrantsz schipper borge gestelt om te volcomen ende te volbrenghen alle tgunt dat voirscr is Ende is dairvoren borge worden Jacop Oem Jacopszoen ende de voirsz scipper geloefde synen borge wel te quyten ende schadeloes te houden Ende dit wordt bevolen inder stede register te teyckenen
</main>
<end>
</end>