Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1517_3

<begin>
</begin>
<main>
Upten vijften dach in Decembri anno XVe ende zeventien doe compareerden inder camer van Dordrecht in presentie vanden schout burgemeesteren scepenen raid ende outrade collegialiter vergadert zijnde Heynrick Blau van Campen coepman ende schipper van een crayerschip van Campen ende Heynrick Scherff van Deventer coepman in een hulckschip daer schipper Jacop Hop van Rarop uut Waterlant schipper off is bevracht up Deventer mit Cornelis Adriaensz onsen poerter de waert inden Hollantschen thuyn te kennen gevende hoedat die voerseide twee scepen geladen mit Berger vysch ende anderen goeden gecomen zijn van Bergen in Noerwegen over die zee tot binnen tgat vander Maze ende overmits den tegenwoerdigern ijsganck soe en hebben zy de voerseide scepen nyet vorder mogen brengen dan omtrent die stede vanden Briele aldaer de voerseide scepen leggen in perikel ende vreesse overmits dat zy de voerseide scepen nyet en mogen bergen ten ware dat zy ontladen waren versoeckende ende begerende daeromme dat die goede luden vanden gerechte ende ouden raide gelieven wilden uuten name vander stede van Dordrecht hemluden te consenteren ende te gonnen dat zy horen voerseiden scepen aldaer zy nu leggen ontladen mochten presenterende al tgoet dat zy uuten voerseiden scepen ontladen sullen eerst ende alvoren te doen brengen voer die stede van Dordrecht ende aldaer merct mede houwen aleer zijt ergent elders sullen voeren off doen voeren ende voirt in tyden van open water mitten voerseiden scepen te doen sulcx als die goede luden vander stede van Dordrecht voerseit ordineren sullen Twelck den voerseiden comparanten gemerct tgunt dat voerseit is tot hoerre bede ende begeerten geconsenteert is mit voirwaerden dat zyluden in tyden van open water den voerseiden scepen mit tsurplus vanden goeden datter in gebleven sal mogen wesen oft anders ledich gehouden sullen wesen te brengen voer die stede van Dordrecht ende aldaer te voldoen trecht vander voerseider stede in alder manieren off die voerseide scepen mit hoerre volre last voer die voerseide stede van Dordrecht gecomen hadden Twelck die voerseide comparanten alsoe beloefden te volbrengen aleer zy die voerseide scepen uuter Maze ofte elders voeren ofte doen voeren sullen Ende die voerseide Heynrick Scherff was hierinne vervangende den voern Jacop Hop schipper van Rarop om tvoerseide scip hier te brengen ofte doen brengen als voerseit is daertoe die voern Heynrick Blau ende Heynrick Scerff beyden horen behoerlicken eedt gedaen hebben tonderhouden ende te achtervolgen tgunt dat voersz is Ende dit wordt bevolen inder stede regyster te teykenen
</main>
<end>
</end>