Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1527_1

<begin>
</begin>
<main>
Alsoe up huyden den XXIIIen Augusto anno XVe zeven ende twintich gecompareert waren voir die vanden gerechte die van den ouden raide ende den gueden luyden vanden achten inder camer van Dordrecht die koermeesters vanden harinck hem aldair beclagende vande zoberheyt hairs loons vant koeren ende donwillicheyt die de coopluden tegen hem toonende waren versueckende daerop vander selver camere te hebben provisie ende ordonnancie omme hemluden daernae weten te reguleeren soe is hyerup by denselven gueden luden vanden gerechte vanden ouden rade ende vanden achten voirsz geordonneert ende verdragen datmen denselven koermeesters betalen zal van elck last brandts dat zy koeren gelijck men van oudts gewoenlick is te betalen ende van allen anderen harinck die hier binnen der stede vercoft ende nyet gekoert en wordt daeroff zullen zy hebben drie groot ende wat over zee gaet dairof en zullen zy gheen koergelt hebben indyen dair gheen coop of en gaet behoudelick dat die vanden Bussche zoe vry zullen zijn als die andere vreemde coopluden van buyten dewelcke insgelijcx gheen koergelt geven en zullen indien dair gheen coop of gaet ende dieselve koermeesters die nyet en koeren Ende dit wordt bevolen inder stede register te teyckenen
</main>
<end>
</end>