Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1529_1

<begin>
</begin>
<main>
Alzoe dagelicx veel van onsen poirteren hem tegens taenstaende geding uutter stede absenteren ende vervorderen over zee ofte elders buyten te varen soedatmen op hemluydcn int geding geen recht spreken en mach dairdoer onse poirteren hoer schult ten afteren bliven teen gedingg voer ende tander nae om hierinne te voersien soe wordt op huyden den XIXen dach van Junio anno XVe negen ende twintich byden schout bourgemeesters scepenen raidt oude raidt ende den goeden luyden vanden achten eendrachtelick geordonneert verclaert ende in koren geleit tot wat tyden enich van onsen poirteren voer tgeding over zee ofte elders uutter stede voere soe salmen dien poirter tsynen huysse binnen tgeding doen drie blinde weten ende tenden die drie weten op hem drie dingdagen aftereenvolgende clagen ende indien hy binnen die drie clagen binnen der stede noch tantwordt nyet en quame soe soudemen ter dorder clage die zaeck van boven beneden inder camere wysen ende continueren ten eersten die gedaechde thuys gecomen soude sijn Alsdan salmen hem een rechtelijcke wete doen tot sijnder woenstadt om hem jegens den eysscher te comen verantwoirden wel verstaende indien hy naer die kenlicke wete nyet ter antwoordt en quame ofte yemant van synen wege gemachticht soe soude die eysscher dan sijn recht hebben opten gedaechde in alder manieren oft binnen tgeding waer Ende dit wordt bevolen inder stede register te teykenen
</main>
<end>
</end>