Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1530_2

<begin>
</begin>
<main>
Op die clachten inder camere van Dordrecht gedaen by Ariaentge Tielman Adriaenszoens die backer huysvrouwe uut zaecken dat zy een Coppen Foykens rechtelic mit eenen vangbrief had doen vangen welck nyettegenstaende was hy nochtans tselve recht inobedient van te betalen pant te wysen of binnen sonnenschijn te gaen in houdt ende yser begerende advyz hoe ende in wat manieren zy tot entelic executie zoude mogen geraecken om te hebben betalinge Dairop byden goeden luyden vanden gerechte ende vanden achten collegialiter vergadert zijnde den XVIsten dach van Decembri anno XV e XXX wel doersien die koren vander stede en op alles rypelic gelet verclaert is dat die vorscr Ariaentge ende oeck alle andere onse poerteren wie zy zijn die vangbrieven opten anderen hebben daermede zy hoer partie recht gedaen hebben indien diegeene die trecht soe gedaen is dan bynnen sonnenschijn nyet en betaelde geen pant en wijsde ofte op Putock nyet en ghinge in besloeten vangenisse sal die schulteysscher dan comen inder camere mitten dienair die trecht gedaen heeft daer dan over mogen clagen ende darentenden dan sterck maecken omme alsulcken als trecht der stede inobedient opter straten te mogen vangen uut horen huysse te halen ende brengen op Putock in besloeten vangenesse Ende indien zy die doren gesloeten hielden sullen die mogen opdoen by die beste middelen die zy sullen konnen ende mogen Ende indien zy dan noch voirghingen ofte hem verborgen hielden soedatmen by hemluyden nyet en mocht comen om te affheysschen zoudemen dan desgeenen goet die zoe voerghinge ende hem verborge tot zooveel als den eysscher onbraecke mogen uutten huysse dairmen dat bevinden zoude halen ende brengen in bewairder hant om daerop ten naesten gedinge te mogen procederen als op zijn besette goeden Ende dit wordt bevolen inder steder register te teykenen
</main>
<end>
</end>