Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1530_3

<begin>
</begin>
<main>
Int jaer XVe XXX den XVIIsten dach van Decembri compareerde Alied Koenend Willem Willemsz wedue inder camer van Dordrecht collegialiter vergadert zijnde te kennen gevende voer haer ende voer Jannige haer onmondige dochter dat haren man voersz gestorven was vander haestige zieckt ende zelfs daeran gelegen had haer daerom nyet geoerloft en was geweest naevolgende tgebodt mitter clock daerof gedaen binnen die eerste ses weken te mogen comen ende gaen onder tvolck om te mogen vertien naevolgende trecht deser stede begerende hierom die vorsz Aliedt Koenen inden naem als vorn dat zy zoude mogen vertien guets ende quaets naden rechte vander stede vanden naegelaten goeden haers mans voersz Achtervolgende desen om die reden ende saeck wil voersz zoe heeft die voersz Ael voer haer selven ende die borgmeester van sweeskijnts wegen vertegen guets ende quaets vander erfenisse ende naegelaten goeden van Willem Willemsz vorn ende is bewaert mit vollen vonnesse ende mit allen recht dat zy geen scade liden en sullen van alsulcke schulden als die voirn Willem Willemsz schuldich mochte wesen int leste van zynen levenden live Ende dit wordt bevolen inder stede register te teykenen
</main>
<end>
</end>