Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1534_2

<begin>
</begin>
<main>
Item int jaar ons Heren MCCCCC ende XXXV op sinte Bartolomeusdach doen wart dit nagescreven openbaerlijck ten Augustinen in die groete ende gemeen margespraeck gelesen ende daernae gecoert met die meeste stemmen om te onderhouden inden gilde vanden cupers ende ter selver tijt als dit nagescreven gecoert wert doen saten aldair als dekens Cornelis Willemssen Herman Hermansen ende Henrick Govertssen die dit nagescreven instrument las Alsoe als gemeenlick in allen gilden ende neringe vanden ambochten ende gewoenlick recht ende ordenancie is goet dat eenige gildebroeder aengaende haeren ambocht coft dat sy malcanderen daar paert ende deel of doen twelck den gilde vanden cupers oeck voertijts in ordonnancien ende gewoonte van eenen omloep gehadt hebben dat duer versumelickheyt misbruyckt wort ende nu verlopen is daerom nu grooten twist dagelijcx uutrijst ende scijnt tot dootslach ende groeten qualick varen te comen onder den gemeenen gesellen vanden ambocht want sy die intreste achterdeel ende groete scade niet en connen gedragen ende oeck onbehoerlick is dat hem daerof van haren medegildebroeders geboert als dat sy een goet duerder betalen moeten dant gecoft is ende jagen den vreemden man dat gelt inden buel tot achterdeel vanden gesellen Daerom begeren wy van u onse voorstanders ende dekens in dese tegenwoordiche morgesprake een omvrage daerof te hebben ende te hoeren van alsulcke pointen als hiernae bescreven staen wat daaraf wesen sol Te weten ist dat eenige van onsen gildebroeders eenich goet coopt aengaende die cupery daer geenen gemeenen omloop of en geschiet soe sal onsen gildebroeder die dat goet gecoft heeft eerst ontfangen datt fierendeel ende ist dat eenich van onsen gildebroederen wat te doen hebben aengaende die cupery soe sal hyse mededeelen ende latense ontfangen van die ander drie deelen in alsulcke coop als gecoft is indien sijt begeren ende en coempter niemant van onsen gildebroederen die wat begeert soe sal alle dat goet den coeper alleen behouden Ende of eenighe van onsen gildebroeders eenich goet coft aengaende die cupery te borcht op daghe ende een ander gildebroeder oeck wilde ende wat begeerde te hebben soe souden hy coeper ende vercoeper te vrede stellen of dat gereede gelt daerneder legghen Ende ist sake dotter II III IIII of meer gildebroeders comen ende begeren van die cupery als voerscreven staet soe sullense daerom cavelen wie eerst ontfangen sal Ende wie hier contrarie ende tegens dede ende synen medegildebroeder weygherde als hier voerscreven staet dat waer op die verboernisse van sinen gilde ende daerenboven noch te geven Gode ter eeren ende tot beternis vanden gilde een kaersse van vijff pondt was op sinte Ewouts outaer in die groete kerck alsoe dick als hijt dede
</main>
<end>
</end>