Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1543_2

<begin>
</begin>
<main>
Item soe gebieden die g l vander stede alle degenen die mit haeren beesten hier ter merct comen sullen dat sy mit haeren beesten niet eer te toech en staen dan des sWoensdachs morgens opte boeten van drie pont soewel den coeper als den vercoeper af te nemen
Ende datmen int Steech Over Sloet vanden Augustinen siekhuys achterwaerts de beesten aen beyde syden vander straten sal moegen setten maer vanden selven huyse voorwaert tot aen die Voorstraet toe geen beesten gestelt en sullen worden in eeniger wijs om de benautheyt vander selve strate wil opte boete valn thien stuvers terstont by de sheeren dienaers ofgenomen te werden
Ende datmen oick aen de Voorstrate vanden huyse tegen Jan Bollen steygart over geen beesten setten en sal dan aen de eensyde vander straet te weeten aen de hoechsyde daer st Jans cappel staet totter Tollebrug toe om de benautheyt der straten opte boete van thien stuvers
Dat oick niemant sijn leech scepen en houde leggen aen de westsyde vanden hoeffde int diep aen haer ancker ende diegeene die eenich hout of ander goet hebben leggen aen de westsyde vanden hooffde voorsz dat sy dat alsoe gevuychlecke leggen datmen daer gerieffelijcke die beesten ende anders op ende af scepen mach op die boete van drie pont ende correctie van scepenen ende van gelijcken oick opten Rietdijck
Dat oick niemant eenige beesten en lade noch en ontlade aen die hoofden van Botgens poort ofte de Spoypoert aenden Molendijck of aen de Myle op de boete van drie pont
Item dat niemant verwerpe calveren longen hoeffden of eenigerhande vuylnis ofte onreynicheyt die uuyt de beesten coemt opter straeten en werpt ende daer laet leggen noch in geene havenen noch in geene deser stede grachten en werpe maer alle deselve vuylnis drage buyten der stede mueren int water ofte int viercant vanden backen daertoe geordonneert opte boete van drie pont
Voort gebieden die g l vander stede dat geen vremd man van buyten harnasch panser noch wapen en drage opte boete van drie pont ende de wapen voort verboert
Item dat niemant der stede bruggen steygarden noch oick sijn strate buyten sijn sloe en verhuere opte boete van drie pont ende oick een yegelick voor sijn doere ruyminge doe alsulcke hout als hy leggende mach hebben ter plaetse daer die cramen behoeren te staen op een boete van drie pont
Dat oick niemant geen stee en beslae dan daer hy selver staen sal met een craem op die boete van drie pont
Dat oick niemant cramen en sette noch stee en beslae voor den huyse daer die wage hangt tussen den huyse genompt thamerken ende die waechsteygart aen geene syde vander strate opte boete van drie pont
Item dat niemant die kuyck en slae mitter byle optie boete van een stoeter
Item dat geene slenaers hem vervorderen met die slede te ryden opt houtwerck vanden hooffden buyten de Vuylpoort noch opten Ryetdijks opte boete van thien stuvers
Item dat soe wie eenich houtwerck ofte andere dingen hebben leggende in de Cruyscappel daer dagelicx misse gelesen werdt dat sy dat van stonden aen ruymen ende wech doen ende geen goet meer en brengen opte boete van thien stuvers
Alsoe eenige die gequetst sijn hem vervorderen te meester te trecken buyten der stede sonder haere quetsuren te laeten besien by scepenen als recht is waerdoer arger gescapen waer te coemen om daerin te voorsien waerschouwen die g l vander stede eenen yegelijcken sijn quetsuren te verthoenen voer scepenen eer hy uuyter stede treckt op een boete van thien pont ende correcti van scepenen
Item dat diegeene die buyten marcte geordonneert is te staen onder de hal met peenwortelen koelen moes ende ander oeft dat deselve soe lange als de cramen staen haer plaetse sullen hebben om voort te staen in de Vriesestraet aen deen syde vander straet opte boete van thien stuvers ende correcty van scepenen
</main>
<end>
</end>