Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1566_1

<begin>
</begin>
<main>
1. Inden eersten omme voortsaen te hebben goede geregeltheyt op die toesichte vanden brandt ende te praecaveren die periculen ende inconvenientien daervan comende hebben die vanden gerechte der stede van Dordrecht voorsz geoordoneert ende gestatueert mits desen dat van nu voortsaen elcke huyse waerdich zijnde hondert ponden Vlaems gehouden sal wesen te hebben een brantemmer ende een huys waerdich zijnde duysent Carolus gulden twee emmers ende twee duysent Carolus guldens waerdich zijnde vier emmers Waervan die gecommitteerden deser stede gehouden sullen wesen visitatie te doen tweemael tsjaers
2. Ende ten eynde deselve emmers van nu voortsaen in toecomenden tyden beter onderhouden sullen moegen werden hebben die vanden gerechte voorsz gecommitteert ende gestelt committeren ende stellen mits desen Bastiaen Cornelisz ende Claes Tack die goede toesichte hebben sullen metten emmers die ten brande gelevert werden om die den eygenaers te restitueren naeden brandt tot haeren coste ende indien die verloren ofte verbrandt werden nieuwe te leveren mede tot haeluyder costen alsboven die daervoer jaerlicx genieten ende ontfangen zullen van elken emmer een halven stuver
3. Item dat een yegelic wie hy zy tzy geestelic oft waerlic gehouden sal wesen sijn brantemmeren te hangen voor int eerste ofte gereetste van zynen huyse ende en sal nyemande die voorsz emmeren moegen besigen in zijn selffs saecken dan alleenlic in last ofte noot vanden brandt te uuyten ende dat opte boete van een stuver te betaelen van elcken brantemmer soe dickwils ende menichwerven yemande bevonden sal worden contrarie van tgunt voorsz is gedaen te hebben
4. Ende omme te weten oft yemande zijn brandtemmers misbruycte ofte in zijn voerhuys nyet en hangt als voorsz is soe sal die emmermaecker l tallen tyden vanden jaere alst hem belieft moegen gaen met twee personen die byden voorsz gerechte daertoe geordonneert sullen werden die voorsz brantemmers visiteren ende indien yemande bevonden werde gebrekelic int gundt vorsz is die salmen offnemen die voorsz boeten die geappliceert sullen werden te weten teen derdendeel tot behouff vanden voorsz twee personen ende tderde derdendeel tot behouff vanden emmermaecker Welke boeten de breuckigen terstont offgehaelt sullen werden in gelt ofte panden tot des onwilligens coste
5. Item indien eenige brandtemmeren inden brande verloeren ofte verbrant werden ofte van ouderdom versleten ofte onbequaem worden ten brande soe sal de voorsz emmermaecker inde plaetsche vanden verdorven ofte verloeren brantemmer schuldich wesen te leveren eenen nieuwen tot zynen coste van goeden lere die mont stijff gevoort ende sterck gehengelt daer die vanden gerechte voorsz hem aen genougen sullen ende dat binnen een maent naedat hem tselve geeyscht sal zijn opte boeten van elcken emmer thien stuvers tot prouffyte vanden heer ende die vanden gerechte voorsz
6. Ende indien de emmermaecer den voorsz verloeren verbranden ofte verdorven brantemmere ofte emmeren binnen den voorsz tyde nyet en restitueerde soe sal diegeene die den brantemmere verloeren sal hebben tselve den gerechte clagen die hem daervoeren nieuwe brantemmere ofte emmeren op coste vanden emmermaecker sullen leveren Ende indien yemande zijn emmers nyet terstont en eyschte als die brandt over is die sal gehouden zijn op zijn selffs cost andere te copen
7. Item indien yemande vanden inwoenders deser stede zijn brantemmere ofte emmers ten brande brochte die sal die aldaer laeten ende die emmermaecker daermede laeten bewarden omme te visiteren oft daer yet aen gebroucken is ofte ander gebreck van ondichticheyt ofte diergelijcke daeraen waere omme datte repareren ende dengenen die se toebehoeren weder thuys te brengen Ende off yemande synen brantemmer ofte emmeren sonder consent thuys haelde ofte brochte die sal verbueren van elcken emmer die boete van vijff stuvers ten prouffyte vanden here ende den gerechte voorsz ende en sal in sulcken gevalle de emmermaecker nyet schuldich zijn sulcke thuysgehaelde emmeren op die eerste schouwe te verantwoerden maer sal staen tot laste vanden genen die zoe zynen brantemmer ofte emmeren thuys gehaelt hebben
8. Item die voorsz emmermaecker sal gehouden zijn zelffs te compareren tot allen tyden als die schout ende gerechte sullen gaen schouwen die brantemmeren om met hemluyden omme te gaen met zijn register ende hem te verantwoorden jegens dengenen die over hem sullen willen claegen heure brantemmeren aengaendeende de emmermaecker sal oyck den gerechte moegen claegen indien hy bevint dat die brantemmers in eenichsins misbruyct worden twelck byden gerechte voorsz berecht sal worden
</main>
<end>
</end>