Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1566_2

<begin>
</begin>
<main>
1. Die guede luyden vander stede vermaent ende belast sijnde by diversche missiven zoe vander Conincklijcke Majesteit onsen genadichsten heere als vander hertoginne regente etc om guede ende scherpe toesichte te nemen opte vergaderingen die onder dekxsel van predicatien [gehouden worden] 1 ende soemen nu bevint doer beroevinge van kercken ende anders tselve te tenderen soe te beduchten staet tot meerder inconveniencien dan zy wel schynen soe hebben zy huyden tot bewaernisse deser stede geordonneert ende gestatueert dese navolgende articulen
2. Inden eersten dat alle schepen van boven comende zullen gehouden wesen te blyven leggen buyten deser stede een getyde lanck sonder eer te moegen binnen deser stede schieten ofte comen ten waere by nootsaecken ende dan by consent van burgemeesteren deser stede
3. Ende sullen gehouden wesen over te leveren alle alsulcke wapenen als zyluden in haeren schepen sullen hebben sonder eenige daerinne te behouden diemen hemluyden restitueren zal tot hueren vertrecken
4. Ende soe wanneer deselve schepen sullen binnen de havenen deser stede inschieten ofte comen sullen gevisiteert ende duergesocht werden ende dat die schipper gehouden sal wesen by gescrifte over te leveren in handen vanden burgemeester deser stede die namen ende toenamen vanden schipgesellen ende andere die in haeren schepen wesen sullen waervoeren oyck die schippers gehouden sullen wesen te responderen soe lange sy in haeren dienste wesen sullen
5. Item dat alle borgeren deser stede die eenige buytenluyden herbergen ofte binnen haeren huysen ontfangen gehouden sullen sijn goet regart ende toesicht te nemen wat gasten zy ontfangen ende haer gasten waerschuwen dat sy haer geweer afleggen ende haer namen alle avonts een halff uyre naer tsluyten vander poorte op laeten scryven ten huyse van Claes Cornelisz Moy inde paspoort op peyne vanden boeten voerden vreemden luyden selven te betaelen
6. Item dat nyemant van buyten hem en vervordere binnen deser stede gaende te draegen eenich geweer ofte wapen opte verbeurnisse vanden selven wapen ende die boete van drie ponden
7. Item dat nyemant die geen poorter deser stede is hem en poege ofte vervordere te comen aender stede vesten hetsy opt niewewerck ofte op andere vesten des avonts een halff uuyre naer tsluyten vander poorte ende des morgens voor het opgaen vander poorte
8. Item dat nyemandt hem en vervordere eenige staetkettingen los te maecken ofte yet te breecken ander stede vesten ofte muyeren opte peyne van zeer strengelic gecorrigeert te werden een anderen ten exemple
9. Item dat nyemandt hem en vervordere eenige aerde te haelen vanden wallen ende vesten deser stede op een boete van drie ponden
10. Item dat nyemant by daege of by nachte als die poorten gesloten sijn vanden noorden suyden ofte westen comende zijn schip en meere aenden deser stede staetkettingen maer mit zijn schip blyve leggen int diep aen sijn ancker ende als die poorte opengaet ende binnen der stede comen wilt dat hy sijn dennen aen beyden syden open doe ende oepen houde staen ende sijn schip laet besien op een boete van drie ponden ende correctie van schepenen
11. Item dat een yegelic borger deser stede wie hy sy sijn harnasch ende wapen voer in sijn huys gerect bij hem hebbe om tot allen tyden gereet te zijn alsmen des te doen sal hebben
12. Item dat alle die vanden gerechte vanden ouden rade vanden achten ende die geswoeren schutters hemselven opter strate vinden ende helpen goede toesichte houden daegelicx mit sijn cort geweer als rapier degen ofte swaerde soe dat behoert op die boeten van tien stuvers hiervan sal die eene schutter den anderen moegen bekeuren ende soe wie in desen bekeurt worde sal gehouden sijn die naeste maenschut die boete op te leggen ende betaelen sonder verdrach
13. Waervan ongehouden sullen sijn die schutters die op werckedaegen eenige ambocht doen maer sullen sy nyettemin daertoe gehouden sijn te onderhouden op Sondagen ende andere heylige daegen
14. Item dat soe wanneer eenich rumoer binnen deser stede soude moegen vallen dat alsdan die schutters vander Grootekerck tot die Tollebrugge toe gehouden sullen wesen hem te vinden voer tstadhuys deser stede met haer geweer daer sy haer lijff mede verweren willen by Adriaen van Blienborch schout ende Wouter Barthoutsz tresorier deser stede ende die dekens die in dat quartier sijn wonende
15. Item desgelijcx vander Tollebrug tottet groote hooft byden burgemeesteren vander Myle ende Drenckwaert ende die dekens in tselffde quartier synde
16. Item insgelijcx vander Riedijcx poorte totter Tollebrug toe omtrent die Nieuwebrugge by Willem Boucquet generael vander Conincklycke Majesteits munte ende Jan van Slingelant ende die dekens int selffde quartier sijnde
17. Insgelijcx vandaer voort tot de Vuylpoorte toe omtrent die Lombaerdebrug by Jacob Adriaensz ende Hendrick Adriaensz ende die dekens int selffde quartier synde
</main>
<end>
</end>