Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1567_1

<begin>
</begin>
<main>
1. Alsoe daegelicx hoe langer hoe meer groote oproer rysende is soe in Brabandt Vlaenderen Artois Hollandt Seelandt ende anderen landen tenderende tot seditie plonderinge ende bederffenisse vanden landen ende steden soe hebben die goede luyden deser stede oyck doer voergaende advertissement ende speciale last ende bevel vander hoecheyt vander hertoginne van Parma regente etc om alle upruer ende inconvenienten te schuwen ende die stede in goede bewaernisse te houden gestatueert ende geordonneert mits desen dese naervolgende pointen ende articulen
2. Inden eersten zoe gebieden die vanden gerechte deser stede dat een yegelicken wye hy sy ende nyemant uuytgesondert die geboeden zall werden te waecke te comen ofte waecke te houden dat zy in persoene comen ende haer waecke houden met alzulcke lanck ende cort geweer daer een yegelicken zijn lijff mede verweren wilt tot alzulcker plaetsen ende uuyeren als zy geboeden zullen worden opte verbeurte van thien stuvers ten waere dat diegeene die ten waecke geboeden werde zieck ofte cranck ofte van huyse waere in welcken gevalle dzelve zall moegen stellen in zyne plaetse een persoene die daertoe bequaem wesen ende nyet droncken zijn zall
3. Ende en zullen die huyerlingen ofte officiers der voersz stede nyet moegen comen inder camere vant stadthuys der voirsz stede opte boete van ses stuvers telcken reyse te verbeuren
4. Interdiceren ende gebieden voerts die goede luyden vander stede dat nyemant van wat qualite ofte conditie hy zy tzy ingesetenen ofte vuytheemschen hem en vervorderen in eeniger manieren die wachte te turberen ofte enige onstandelicheyt te bedryven tegens die waeckers ofte by gebreecke van dien indien yemant gequetst gegrieft ofte dootgeslagen woerde dat dzelve geen verhael daervan hebben zall op yemande ende diegeene die dzelve quetste ofte dootslouch daer nyet aen en zall misbruycken
5. Ende diegene die ter waecke geboeden zullen werden zullen gehouden wesen ter waecke te comen voir het oflaeten van het luyen vande saelclocke deser stede des avonts ende zullen gehouden wesen te blyven opt stadthuys der voersz stede ter tijt ende zoe lange dat die poirtiers vanden Vuylpoorte des smorgens zullen comen om die poorte oepen te doen ende zullen alsdan die waeckers die byden opperhooftman geordineert zullen werden gehouden wesen te gaen mitten poirtiers om die poorte oepen te doen ende dzelve opengedaen zynde zullen zy gehouden wesen buyten der poorten te gaen sien off daer buyten geen wanraet en is ende zullen die poortiers zoe lange die poorte toe houden
6. Item dat diegheene die waecken zullen gehouden zullen wesen omme te gaen zoe dicwils alst den opperhooftman ofte opperhooftmans gebieden zall opte boeten van drie ponden ende correctie van schepenen ende sal die opperhooftman moegen ordonneren eenige vanden waeckers opt nyewe werck te waecken
7. Ende en zullen diegeene die int waecken ommegaen nyet moegen drincken opt stadthuys ofte in enighe herbergen ofte andere huysen ofte wijnkelders opte boeten voirsz
8. Interdicerende tot dyen eynde allen herbergiers den voersz waeckers in haeren huysen te setten om die te tappen eenich bier ofte wijn opte boeten voersz tappliceren het derdendeel tot profyte vanden aenbrenger
9. Item dat nyemant wye hy zy nae het oflaeten vande zaelclocke des tsavonts zall moegen langs der straten gaen sonder licht opte boeten voersz
10. Voerts zoe geeft die schout van sheeren wegen volcomen macht allen hooftmans ende waeckers die ten waecke by tyden geboeden zullen werden indien zy int ommegaen yemande bevinden gaende langs der straeten sonder licht ofte eenigen onlust maeckende dat zy die zullen moegen apprehenderen in alre manieren off die schout dair jegenswoirdich waere
11. Item gebieden dat nyemant wye hy zy hem en vervordere opte waecke te comen hy en zy geboeden te waecken opte boeten voirsz ende correctie van schepenen
12. Ordonnerende voerts een yegelicken tzy herbergier ofte anders wye hy zy die eenige vreemdelinghen ofte vremden binnen haren huysen ontfangen gehouden zullen zijn dzelve in gescrifte ende by naems ende van wat plaetse dat zy zijn alle daechs over te leveren ter plaetze daermen die paspoort geeft des tsavonts voir acht uuyren des somers ende tot ses uuyren des winters opte boeten van drie ponden Welcke bewaerder vanden paspoorte gehouden zall zijn van stonden aen dzelve cedullen te leveren in handen vanden schout ofte burgemeester deser stede opt stadthuys op privatie van zyn officie
13. Item dat nyemant wye hy zy en zall moegen binnen zijn huyse logere eenigen bedelaers ofte vagabonden die nyet opgescreven zijn op wel strengelic gegeselt te werden ende voirts gebannen te werden uuyt deser stede
14. Item dat die poortiers van nu voirtsaen gehouden zullen zijn te staen ofte te sitten binnen die poorten ende buyten haer huyskens mit haer gewoenlick geweer ende guede toesicht ende wachte te houden opten personen die daer uuyt ende innegaen ende nyet gehengen datter eenige vremde bedelaers ofte vagabonden binnen deser stede comen op privatie van haer officie ende correctie van schepenen
15. Item dat van nu voertsaen geene schippers ofte schuytenaers hem en vervorderen eenige bedelaers ofte vagabonden inne te nemen om binnen deser stede ofte vryheit van dien te brengen nochte oick yemant wye dattet zy aen eenige poortkens ofte indern havenen aen ofte op te setten dan aen tgroote hooft Rietdijck ofte Vuylpoorte opte boeten voorsz
</main>
<end>
Aldus geordonneert ende gestatueert ten daege ende jaere voirsz My present G Michaelis
</end>