Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1570_1

<begin>
</begin>
<main>
Alsoe tot diversche tyden metter clocken gepubliceert ende vercondicht is gheweest dat nyemant eenighe verkens soude houden lopende lancx der stede straeten ofte vesten op eenige kerckhoven ende dat dagelicx bevonden wordt contrarie vandien geschiet te zijn twelck geschiet overmits dat eenighe sheeren dienaers onwillich zijn dexercitie vandien te doen immers dat arger is doer die vinger zien ende daermede simuleren mits nemende eenich gelt ofte maeckende verdinge ende omme daerinne te remedieren zoe belasten die goede luyden deser stede den sheeren dienaers dat sy den voersz verckens lopende als boven sullen aenvaerden ende offnemen denghenen die dselve verckens toebehoren [op] die boete hyernaer verclairt Interdicerende voirts denselven sheeren dienaers nyet te simuleren offte duer die vinger te sien met yemant wie dattet soude moghen sijn offte eenich verding met yemandt te maecken op privatie van huer offitie ende correctie van schepenen
Voerts interdiceren ende waerschouwen die goede luyden deser stede eenen yegelicken dat nyemandt hem vervordere achter deesen daege eenige verckens ofte geyten te laeten loopen lancx des sheeren straete als achterstraeten kerckhoven ofte aen het nyewe werck maer sullen gehouden weesen dselve verckens ofte geyten te houden binnen haeren huyse ofte eyghen erffve mits blyvende twee voeten van haerluyder gebuyren erffven ofte heyninghen ten waere dat zy deselve verckens ofte geyten deden verluchten in welcken gevalle sal daer yemande continuelicken by moeten sijn ende dat opte boete van thien stuyvers voer deerste reyse ende voir die tweede reyse van twintich ende voer de derde reyse opte verbeurte vanden verckens ofte geyten all tot proffyte vande sheeren dienaers voersz
Interdicerende voirts eenen yegelicken dat van nu voertaen yemendt hem en vervordere te houden ofte te stellen eenighe verckenschotten opter stede straeten soe voir- als achterstraeten noch aender stede vesten mair zullen gehouden wesen die off te doen breecken binnen XIIII daeghen toecomende off datmen die aff doen breecken sall tot haeren costen
Verbiedende insgelijcx dat nyemant hem en vervordere te houden eenige verckens opter stede graften ofte havenen derselver stede tensy dat die verckenschotten staen een roede vanden grachten ofte haevens voersz ende twee voeten van sijn buyrmans erffve opte verbeurte van thien stuyvers van elcke vercken voir deerste reyse ende van twintich stuyvers voir de tweede reyse ende voir die derde reyse op verbeurte vanden selven verckens te verbueren dselve boeten soe dicwils als ymant bevonden sal werden contrarie van deesen gedaen te hebben
Item dat gheen verckensdrivers die met menichte van verckens alhyer te merckt comen om te vercoopen eenige andere plaetsen sullen moghen nemen dan sullen alleenlick met haeren verckens te tooch steen in Steechoversloot op een boete van drie ponden naer dat sy daervan gewaerschouwet sullen sijn
Ordonnerende ende authoriserende den sheeren dienaers dat sy sullen moghen gaen visiteren die huysen daer sy vehemente suspicie hebben dat enige verckens gehouden souden werden ofte haevens ofte grachten deeser stede sonder dat ymandt daer sy comen sullen dselve visitatie sullen moeghen beletten opte boete van thien ponden elcke reyse te verbueren
</main>
<end>
</end>