Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1583_1

<begin>
</begin>
<main>
1. Alzoo daghelicx hoe langher hoe meer gevonden worden groote abusen op de wachte soo hebben dvoorsz myne heeren gheordonneert ende gestatueert ordonneren ende statueren mits dezen dat van nu voortsaene alle de rothmeesters dye tselve officie by lotingh ofte treckingh van biljetten te beurten ghevallen is ghehouden zullen weesen zoo wanneer zy bydenghenen dye de wacht ghebyeden zall ter wacht gheboden zullen worden terstondt haire rothghesellen haire wacht te ghebyeden ende hemselven tsavonts op de uyere alst hair gheboden zall worden te comen op den stadthuyse deser stede ende aldair trecken by biljetten wair haire wacht dyen nacht weesen zall ende daervan haeren rothghesellen adverteren opdat een yeghelick perfectelijck weten mach wair dyen nacht zijne wacht weesen sall ende dit op de boete van sesse stuvers voer elck persone te verbeuren dentwelcken zy zulcx als voersz 1 is nyet en hebben laeten weten dewelcke men metter daedt des anderen daechs anden rotmeesteren zall doen 2 executeren ende voorts boven die voorsz boete noch te betalen een stuver 3 voorden provoost dye executie doen zal
2. Voorts zullen allen borghens dye deur heuren rothmeesters te wachte onboden zullen zijn ghehouden weesen selffs in persoon te wachte te comen op alzulcke plaetsche ende uuyere als hair byden rothmeesters bevolen zal worden met hair zyde- ende halsgeweer ten waere dat sy van huys sieck ofte cranck waeren ofte deur nootsaickelichede van heuren kapiteyn expresse consent ende oerloff hadden in welcken ghevalle dzelve ghehouden zullen zijn een ander clouck man wesende poorter ofte ingheseten deser stede in heure plaetsche te stellen wairvoor zy ghehouden zullen wesen te verantwoorden zoo eenighe ongheschicteden ofte ongheregeltheden by hem op de wacht ghepleecht worden ende dit op de boete als voersz is
3. Des zullen hyervan vry ende ongehouden wesen alle diegheene dye over zee ghereyst zullen wesen dewelcke nyet ghehouden zullen zijn yemandt in haire plaetsche te stellen maer wanneer zy thuys ofte binnen slandts van huys zijn zullen hem alsdan moeten reguleren ghelijck andere burghers als boven
4. Ende zullen alle degheene dye de wacht hebben ghehouden zijn haere coronellen kapiteyns luytenants ende rothmeesters te obedieren int gheene haer beroerende de wachte gheboden zall worden op de boete als voersz
5. Ende sullen den gheheelen nacht nyet moeghen vander plaetsche gaen daer zy bescheyden zijn voer ende alleer zy byden wachtmeesters ende schutters ofte andere dye dairthoe verordonneert zullen worden dairoff ghehaelt zullen worden
6. Ende zoo wye droncken ter wacht comt ofte droncken drinct op zijn wachte zall verbeuren de boete als voersz is van alle welcke voorsz boeten zullen gaen deen helft tot profijt van denghene die de wacht bewaert ende dander helft tot profijt vanden provoost dewelcke daerthoe expresselic aenghenomen is byden welcken dzelve naedat de wachte offghegaen zullen zijn geexecuteert zullen worden met pandthalinghe ofte anders zulcx hem daertoe by mynen heeren gheordineert zall worden
7. Ghebyedende dairom die ghoede luyden dezer stede dat hem nyemande en vervordere den voorn provoost te misdoen ofte misseggen met woorden noch met wercken beroerende dexercitie van zijn officie op correctie van schepenen Ende oft ghebeurde dat yemandt de voersz pandthalinghe ofte executie wilde contrarieren ofte verhueden zulcx dat de voersz provoost ghenootsaict waere hem met synen dienaers te stercken om dexecutie te volbrengen dat waere op correctie van schepenen
8. Voorts zoe ghebyeden myne heeren voersz dat nyemandt wonende alhyer binnen deser stede van Dordrecht hem en vervordere eenighe nachtghasten ofte vreemde luyden des nachts te logeren oft hy en hebbe zynen naem eerst ende allvoren voir het luyden vander saelclocke ofte wachtclocke aenghebracht in de Wijncoopers capelle op de boete van dertich stuvers
9. Voorts zall eenen yeghelijcken ghehouden wesen hem te reguleren naer de verdere poincten ende articulen in de ordonnancie van de wacht lestmael ghepubliceert anno LXXV begrepen
</main>
<end>
</end>