Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1588_1

<begin>
</begin>
<main>
Alzoo dagelijcx zoo langer zoo meer groote ende vele ongheregeltheden ende abusen bevonden werden te gheschieden int coopen ende vercoopen vanden greynen comende binnen deser stede tot merckelick interest ende nadeel zoo vander stede maeckelaerdye ende gherechticheden vanden coopluyden aldaer handelende ende frequenterende soo hebben mijn heeren de regeerders derselver stede omme hierinne te versien geordonneert ende gestatueert dese nabeschreven poincten ende articulen
1. Inden eersten dat alle maeckelaers ende pontgaerders zoowel die jegenwoordelick in officie ofte dienste zijn als die noch sullen aengenomen worden sullen binnen veerthien daghen eerstcomende vernyewen ende stellen borge suffisant ende verseeckerheyt doen voor hare handelinghe onderwindt ende administratie ten minste voor twee duysent Carolusguldens ende daerenboven ghehouden wesen den behoorlicken eet te doen omme alle de poincten ende articulen in dese ordonnantie begrepen promptelick naer te comen ende tonderhouden ende den coopman ghetrouwelick te dienen ende haer laten genoegen met haer behoorlick loon op verbeurte van heur officie ende dat daervan goede notule ende kennisse ghehouden zall werden inder stede register
2. Dat gheen maeckelaer ofte pontgaerder sal moegen wesen coopman van eenigerhande granen ront oft plat saet mee noch andere waeren daervan hy de maeckelaerdye oft onderwint sal hebben noch met yemant eenige vennetschap oft compaignye maer deselve waeren alleenlick vercoopen volgende sijn last ten meesten oirbaer ende prouffijt vanden coopluyden op een boete van thien ponden Vlaems ende vervallen te zijn van sijn officie
3. Item sal de maeckelaer van elck last coorens hetzy hart ofte weeck daer hy over den coop gheweest is ontfangen drie stuvers tot laste van den cooper ofte vercooper die hem te werck gestelt zall hebben
4. Ende vant coren tzy hart ofte weeck of andere waeren dat vercoft wordt byden maeckelaers daervan zy de penningen innehalen sullen daervan sullen zy ghenyeten van tpont Vlaems eenen stuyver sonder dat sy yet anders van haer maeckelaerdye daertvan sullen ghenyeten
5. De gage ofte prouffijt voorden maeckelaers ofte pontgaerders van andere waeren sal wesen van tpont Vlaems eene stuyver ten ware dat eenighe coopluyden heur gelt selve wilden ontfanghen in welcken gevalle dieselve coopluyden sullen prouffyteeren een derdendeel van tpont gelt voorschreven Maer als die goeden deur last vanden coopluyden op dach vercoft worden ende die betaelinghe blijft tot laste van den maeckelaer sal alsdan ontfanghen een braspenninck van tpont Vlaems tzy van granen ofte andere waeren
6. Dat gheen pontgaerders ofte maeckelaers van andere steden of plaetsen hem en sullen moeghen onderwinden binnen deser stede te comen ende veylen eenige granen ofte andere waren maer sal tzelve gedaen moeten worden byden gheswooren maeckelaers deser stede ende tgreyn ofte ware vercoft zijnde sal de maeckelaer van Dordrecht ende nyet van andere plaetsen ontfangen zijn behoorlick loen volgende dese ordonnantie
7. Den maeckelaers ofte pontgaerders des affgevraecht wordende sullen ghehouden weesen eenen yegelicken op heuren eedt te verclaeren ende te kennen te geven hoeveel de greynen of waren daervan zy last hebben mogen gelden of oock voor hoeveel die vercoft zijn ende dat met gereede gelde
8. Ende en sullen egheen waerden oft waerdinnen noch andere persoonen hem bemoyen omme 1 yemant eenich cooren aen te veylen ofte vercoopen tzy binnenshuys ofte op strate dan sullen tzelve ghehouden wesen yemande vanden gesworen maeckelaers te kennen te geven ten eynde deselve naer coopluyden mach sien om tselve goet ten meesten prouffyte ende oerbaer te vercoopen ende dit telcke reyse opte boete van thien ponden van veertich grooten
9. Item sal de coornmarct ghehouden worden opten opslaech ende plaetse daertoe gemaect voor de Groote Kerck van halff Maert tot halff September van seven uuyren des morgens tot twaelff uuyren toe ende van September tot halff Maert van acht uuyren des morgens tot twaelff uuyren toe Ende de maeckelaers sullen ghehouden wesen soo wanneer zy goet aende merct hebben om haer meesters te gerieven den voormiddag de marct wel waer te nemen omme tgoet te vercoopen ende en sullen niet vermoegen voorden middach tot eenigen tyde binnen in off deur de stat eenige greynen te veylen omme te vercoopen dan alleenlick ter plaatse vande coornmarct daer tgoet is leggende
10. Ende oft gebuerde datter eenich cooren ter merct quame naerdat de clocke twaelff uuyren gheslagen sal hebben sal tzelve cooren blyven leggen tot des anderen daechs om op de behoirlijcke uuyre verveylt te worden om te vercoopen volgende dordonnantie ten waere dat in het schip ofte schuyte maer een hoet goedts en ware twelck sy sullen moegen opdoen ende vercoopen aen de behoorlijcke marct tot allen uuyren naerden middach als tzelve aencomen sal Dan belangende de onvercofte graenen die uuyt der lage weerdt comen ende de quartieren daeromtrent ghelegen ende ghewoon zijn te arriveren ende te comen aenden Rietdijck de Nieupoort ende tgroote hooft ofte inde oude haven sullen de eyghenaers oft vercoopers van dien daermede moegen aencomen ende merct houden aen den opslach ofte werff van Verlooren Cost ende dzelve aldaer distraheren ende vercoopen tharen scoonste ende geryve ende beste gelegentheyt tot een half last toe ende daerbeneden Maer belangende tkennipsaet sal tselve alhier opgebracht opgescheept ende vercocht moeghen worden tot believen vanden vercooper ofte eygenaer van dyen naer ouder gewoonte

##

22. Ende dit alles by provisie ende tot anders sal wesen gheordonneert ende houden mijnheeren aen hem de kennisse decisie ende interpretatie van alle swaricheden ende duysternissen die namaels uuyt dese ordonnantie souden moegen rysen
</main>
<end>
</end>