Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1594_1

<begin>
</begin>
<main>
Aengesien datter dagelijcx hoe langer hoe meer clachten ontstaen onder den goeden burgers ende ingesetenen deser stede ter oersaeke vanden huysen ende erven die onder hemluyden gemeen sijn off daer veel persoenen paert ende deel aen hebben deene meer dander min diewelcke niet wel en connen overeendragen aengaende de bewoeninge verhuyringe ofte vercoepinge van denselven huysen ende erven soedat seer noodich ende dienstich is daerinne geremedieert te worden tot voorcominge ende verhoedinge van veelderhande questien processen ende geschillen die Godt betert niet dan al te veel wassen ende toenemen onder den burgers ende ingesetenen jae oick onder broeders ende susters vrienden ende magen ende naer vele costen moyten ende versuymenisse van tijt neringe ende welvaeren causeren ende veroersaeken groote onvrienscap ende onversoenelijcken haet ende nijt des niet en behoert soe ist dat omme hierinne te versien ende miteenen goede ordre ende geregeltheyt te stellen up dit stuck waernaer een jegelijcken hem sal hebben te reguleren mijn heeren schout burgemeesteren schepenen raiden oudtraiden ende goede luyden vanden achten deser stede met rype deliberatie ende wel bedachten raede gekeurt gestatueert ende geordonneert hebben keuren statueren ende ordonneren by desen de poncten ende articulen hiernaer volgende
Wanneer twee off meer persoonen in een huysinge ofte erve binnen deser stede gerechticht sijnde vander huere niet en komen verdragen ende nochtans heur deel oft aenpaert niet en begheren te vercoepen sal diegene die dat meeste deel daeraen heeft die huysinge ende erve mogen bewoenen op alsulcke huyre ofte pacht als schepenen naer verhoeringe van partyen dat taxeren ende schatten sullen sonder dat den bruycker in soodanighe huysinge iet tot costen ende schaden vanden anderen buyten sijn believen sal mogen timmeren ten ware sulcx by schepenen den huysen noodich verclaert werde
Ende als diegene dier tmeeste deel daeraen heeft tselve huys ende erve niet en begeert te bewoenen sal naer hem volgen ende voor dandere gaen diegene die tmeerderdeel daeraen heeft ende alsoe lange alsser yemant is die paert oft deel aen tselve huys ofte erve heeft indien them belieft aldaer te wonen ofte terve te gebruycken sal daerinne geprefereert werden voor allen anderen ofte vremden mits betaelende de huere tot schepenen schattinge als vooren als sy onder malcanderen dies aengaende niet en connen accorderen ofte overcomen
Ende alsser twee off meer persoonen tsamen gelijcke paert oft deel hebben aen een huys ofte erve elcx van hem dat begeert te bewonen off gebruycken sullen sy in tegenwoordicheyt van twee schepenen ten minsten te samen loten wye van hemluyden dat bewonen off gebruyken sal ende sullen schepenen daer present eenen bequamen tijt noemen hoe lange degene die de lotinge wint hetselve huys ofte erve bewonen off gebruycken sal ingevalle parthijen overmits heurluyder oneenicheyt sulcs aen schepenen versoucken mits betaelende jaerlijcx daervoor alsulcke huyre als schepenen in tegenwoerdicheyt van partijen eer dat sy loten sullen hebben getaxeert off geschat
Maer als deen off dander tsy off sy gelijcke of ongelijcke portie off gedeelte hebben begeert uuyte gemeenschap van soodanige huysinge ofte erve te scheyden ende sijn deel off paert te vercoopen gemerckt dat niemant naer rechten ende redenen gehouden is in gemeenschap te blyven langer dan them belieft ofte oirbaer dunckt sal diegene die sijn deel behouden ende niet vercoopen wil gehouden wesen sijn compaignons aenpaert over te nemen ende te behouden tot sulcke pryse in baeren gelde ofte op sulcke dagen ende termynen als by schepenen naer verhoeringe van partyen ende behoerlijck ondersoeck van saeken sal werden gearbitreert ende verclaert blyvende gehouden diegene die van sijn gedeelte scheyt tselve te verwaerborgen ten minsten met willich decreet deser stede Ende dit alles by provisie ende tot dat anders by mijn heeren voorsz sal werden geordonneert
</main>
<end>
Onder stont Geëxtraheert uuyt het Publicatiebouck der stede Dordrecht berustende inde secretarie derselve stede ende accordeert daermede naer collatie by my substituyt-Secretaris der voorsz stede ende was onderteykent H J de Naerden Noch stont onder geschreven Naer collatie gedaen jegens tvoorsz extract onderteykent als boven ende is daermede bevonden taccorderen op den XIden Januarij 1596. Ende was onderteykent H Siegel
</end>