Compilatiecorpus Historisch Nederlands 1.0 (CHN): ambtelijke teksten 1250-1800: gent_1236_1

<begin>
Dit es de regle der gandser brodre ende sustre uander lazerze hus uan gent die gestarct es uan den biscop Onse here de biscop van dornoke grotet met sinen lettren alle die desen brief sullen sien ende seget aldus
</begin>
<main>
Ombe dat uele ghebode doen uele mesgripen ende die teuele tedone hebben laten dicke ueledings achter uan dat men hem gheboden heuet hir ombe willen wi ons houden an en wort dat sinte iacob seget Suuere godelechede ende ombsmetde uor gode es te uersokene wesen ende wedewen ende trostense in harer drofheden ende elken hemseluen tehodene ombesmet uan deser wereld Hirbi micken wi dat aldesumme uan godelecheden es in tedienne iamerliken siken alremest den gonen die god gegesselt heuet met sulken euele dat hem nembermer menslike ersatrie gehelpen mach ende si ombe die sichede bi der wet sin versceden wanden geselschepe alre gesonde Nu danne ombedat wi hebben uernomen in der laserse hus uan ghent bede man ende wif die dar gode dienen endien armen laserzen harde omodelike ende met groten nerenste so ontfan wise in onse besceremnesse Ende ombe dat si ghenoch hebben te done in der sieker dienste newillen wise el niewerincs mede laden sonder dat si sculdech sin tehoudene suuerhede uan lechamen ende eighin opgheuen ende ordinleke cleder dragen ende onderhorech tewesene gemenlike den mester uan den hus Dese ujere dinghe setten wi tehoudene den brodren ende den sustren uan dien hus ouer regle uan leuene Dandere dinghe die geschien mogen alse uan mesdaden te beterne laten wi in desmesters froschepe binnen den hus so dat de grotste mesdaden die men cheghen dordine mesdon sal dat men die uor den biscop es sculdech tebringhene
</main>
<end>
In orcuntscepen ende in gestadecheden uan deser dinc daden wi desen brief scriuen ende onsen segel dran hangen Dimer degode seden diemen int hus hier uormals gehouden heuet die starken wi bi desen brieue Dese lettren waren gemact te ghent des friendachs na sente martins messe ten tuelef hondersten iare ende ten sesse ende dertechsten dat onse here god menslike uorme ontuinc uan dermaghet sente marien
</end>