Lijst

Compilatiecorpus Historisch Nederlands 1.0 (CHN): ambtelijke teksten 1250-1800: gent_1236_2

10. Van der ghebede Alle de brodre ende alle de sustre bede gandse ende sieke moten seggen ouer mattin xxviij pater noster ende also menech aue maria ende ouer uesperen xiiij ouer tander getide namelike prime ende ondern ende middach ende none ende completen moten sire seggen seuene nemar sonendachs ende hoges mesdachs moten de mattinen tue uoud sin Degone diet cunnen moten seggen elkes dachs tue waruen credo ende ene waruen magnificat ende ene waruen nunc dimittis Alsere en broder stereuet of ene suster so mot elc segen ouer den gonen vif honderd pater noster ende also mene aue maria ende requiem eternam diet cunnen of die willen ende diet cunnen mogen seggen ouer de uif honderd pater noster honderd ende uiftech miserere mei deus met requiem eternam so dat dese uif honderd pater noster of dese honderd ende uiftech miserere mogen sin geseit sonder enech uerlat binnen den dertechsten dage dat der broder of suster stereuet int hus Bouen al desen moten si sonderlinge bedinge doen weder di dat hem gratie uan gode comet ouer alle de gone die hem goed hebben gedan ende dagelics doen ouer alle hare friende gestelike ende fleslike ouer die noch leuen ende ouer die uerscheden sin uander wereld ende in gods dienste dot sin Die oc uigilien bi deuotien willen segghen si sullen der ouer seggen dertech pater noster Oc sin si sculdech hem te pinene dat si dar to comen moten alset ware ten oppersten trappe uan bedingen dat si gode mogen bidden hertelike ouer hare uiande Te messen ende te uespern ende te completen moten si alle sin ende oc sondachs ende mesdachs te mattinen het ne ware dat hem siechede of ander wettelike noetsake bename Ten sermone moten si oc comen die mogen alse ment doet in hare kerke
10. bis Dit nes niet in den andren brief Ombe dat mens oc in andern ordinen pleget di willen ende diet cunnen sullen aldus beginnen hare mattinen domine labia mea dat uers ute ende deus in adiutorium dat uers ende gloria patri al ute Ten beginne uan completen conuerte nos ende deus in adiutorium ende gloria patri Nemar tallen andren getiden namelike te primen tondern temiddage tenonen ende teuespren deus in adiutorium gloria patri ende danne pater noster endeten achtersten pater noster uan elken getide per dominum nostrum al ut ende dit uers domine exaudi ende benedicamus domino Deo gratias ende dar na telken getide sullen si bidden ouer alle die in penitentien dot sin dat hem god hare pine mote lichten ende corten
11. Van der silentien Alle moten si suigen ende silentie houden inde kerke die wile dat men dar den dienst uan den getide ende uan der messe doet ende ouer etene ende achter dien dat deslapclocke int hus gelud es tote dien dat si opstan desmorghens uan haren bedden het ne si dat si iet spreken moten dor grot beduanc uan siecheiden Nemar demester ende dundermester mogen spreken ombe notsaken ouer tafle ende inde kerke ende oc mogen si dar andren geuen orlof tesprekene als nod es mar wachten hem wel dat dit niet te dicke ne geschie
12. Van der biichten ende uan den monegene Alle sin si sculdech hare biichte suuerlike tedone enewaruen telker mand ten minsten als si mogen hebben couer uan priestre ende so sullen hem de gandse doen monegen ses waruen in dat iar tepaschen te chincsen te sente marien messe te half oust talre helegen messe te midde wintre ende te sente marien licht messe ende danne sin si sculdec buten uasten ende buten aduente de naste seuen dage uor dese hogetide flesch te daruene dor de werdecheid des sacrements Nemar delazerze sullen hem doen monegen drie waruen int iar te paschen te chincsen te middewintere ende danne sullen si oc fles daruen seuen dage uor die hogetide
13. Van den blotlatene Elc die wille mach hem bloet laten ter adere ses waruen int iaer namelike in die tit dat elken dinket hem seluen nuttelecst nochdanne mot het sin bi smesters wetene ende dinct den mester goed dat ment bloetlaten lette so moet ment letten Die dus geblotlat sin hem salmen moten beddon ichtewat dan degemene prouende nemar die dicker willen blodlaten si moten togen hare nod ende biddens orlof end danne mot si hem bedragen metter gemenre prouende uan den hus het ne si dat hem demester teuergefs iet bet wille doen Die willen mogen hem telker mand ene waruen don blotlaten ter uenteusen end danne moten si hem almetalle bedragen metter gemenre prouende Niemen dimer uanden gandsen brodren nemot ombalene blodlaten op plumin bedde binnen den hus slapen
14. Van den gasten tonthalne Fremden sieken ende die uan conuente uan andren hus es es men in dit hus erlike sculdech tontfane ende hebbe his nod tue dage mach hi hier bliuen ende hebben binnen dien deghenaden uan den hus gelic enen broder Acker sieke mot men herbergen ene nacht Nochdan nemoet men in dit hus negenen lazers herbergen no negenen knape of meicin te dienste onthouden daret of es opembar dat hi in houed sonden ligge
15. Van den capitele ende uan den clagen Demester es telker weke ten minsten ene waruen sculdech tehoudene capitele bede den sieken end den gandsen end dar sin si alle sculdech hare mesdaden tebekenne ende de pine de men hem setten sal gelic harer mesdad sin si sculdech omodelike ende met goeden wille tontfane Dar es den den andren sculdech met warachtecher minnen niet met hatschepen tewrogene uan dingen die openbar sin end die men prouen mach end die gewroget es est sculdech uerdelike tegedogene Niemen ne mot te fremeden lieden gewagen uan den uerholnen dingen des capitels ne uan dien dat dar es gedan niemen nemot oc andren uerwiten de mesdat die leden es dar hi af heuet genoch gedan Die dis iet doet hi sal moten gedogen depine die men sculdech es den ouerhoregen Die ouer iemene clagen wille uor den mester ten nasten capitele dat hem tonrecht gedan es moet hit clagen Lette hit oc langer so nesal sine clage niet dieden Alse dan de clage es gedan degone tewien het bestat tebeterne hi mot stapphands int selue capitele betern end dies nemot hi niet laten
16. Van der penitentien ende wat hier penitentie geheeten es Ombe dat degone die dat capitele houdet moge weten huo elke mesdat es sculdech tewesene gepint so stat hier achter bi elker mesdat degerechte pine gescreuen Pine danne of penitentie es hier geheten op derde tesittene ende op enen nakeden stuol sonder amelaken dar dandre to sien tetene ende alles te daruene sonder brods ende potetens ende biers ende des frindachs teuastene te borne end te brode Dar af mach men oc merken dat sowie so sine penitentie begonnen heuet ende die se niet uuldan heuet alse hi es sculdech te done hi moet se weder beghinnen al uan nieus Sowie danne so dengonen die in penitentien es iet geuet dat tespisen behort sonder desmesters orlof ende dies bedregen werdet men salne moten steken inds gons penitentie Alse dan si tue ombe ene mesdat in geliker penitentien stan so ne mot men den enen negene genaden doen die men den andren niet ne doet Die dan sine penitentie begonnen heuet sondachs ende hoges mesdages mach men se hem ondernemen ende danne als dat hogetide leden es so es hise sculdech uord gehellike te uuldone
17. Vander pine ens dachs Die uan messen of uan uesperen of uan den capitele gebrect die sprect in tid uan silentien ende mer dan tue waruen sonder orlof ende sonder nod etet die dambacht dat hem beuolen es rokeloslike uuldoet die niet nes dar men desen brief in diedsch lest als mene sculdech es in diedsch telesene die at of dranc in onsteden ghehouden setet die sine cleder of ander dinc dat ten hus behort rokeloslike hodet of handelt enen dach sal hi penitentie gedogen
18. Vander penitentie uan drien dagen Die sinen nasten en ledlic word seget of dine fluoct die ten gesetteden tiden sine bijchte niet ne doet die ombe eten of ombe cleder of ombe ander dinc murmerd die sonder orlof iet geuet of nemd die ut den houe gad sonder orlof of in de cokene of in andren husen die uerboden sin oc degandse broder of suster di binnen den hus buten reftre drinct of etet sunder orlof hi ne ware siec met der penitentie uan drien dagen sal ment op hem wreken
19. Van der penitentie uan uif daghen Man ende wif die onderlinge hebben quade sprake end die men wantrowen mach so wie oc so beuolen dinc houdet het neware demester die sins selues eten of anders mans dorperlike woch werepd die murmerd ombedat men hem on effene gedeld heuet die iet uan dien dat ter tafelen bliuet of uan dien dat ter gementucht behort gehouden stect of diet iemene sonder orlof geuet uan wien oc dat men geware mach werden bi tujfelingen uan sinen leden dat hi dronkin si die fremde lieden sonder orlof tetene noded de sustre oc die ut comen sonder ouedlaken of sonder dexsle dat hem betamd ende sonder mantel hoges dages het neware dat si daden labor of dat si dienden ende oc die wile sonder scaplaris die sullen penitentie duon uif dage also alset teuoren geseid es
20. Vander penitentie uan tiene dagen Die sinen geselle slan wille die inde stad uan ghent sonder orlof et of ander dinc danne water drinct die met wiue in hus sonderlinge werschepe heuet die met terningen of met andren wereldliken spele speld de sieke die de uate of teten der gementucht handeld of ontrint of eigindom sonder orlof ende sonder rad onthoudet hi sal tien dage op derde sitten om penitentie te done
21. Uan der penitentie uan tuintech daghen Die bi gode of bi den helegen dorperliken eed suerd die dobedientie die hem in capitelen gesetted es weder seget te ontfane die sinen nasten slat sonder bluod te stortene die diefte beneden tuen schellingen duot ende degandse die derste waruen met eighindome beprouet werd ende sowie so sinen magen of sinen frinden clage teuoren bringet uan eneger dinc die men hem int hus gedan heuet die oc sine sonderlinge nod betoget iemene die pitantie bringet int hus penitentie uan tuintech dagen moet hi gedogen
22. Uan der penitentie uan enen iare ende uan enen dage Die duot sonde uan luxurien oue diefte bouen tuen schellingen die sine gesettede penitentie onwerd heuet tedone die sinen nasten wondet in gehelre hud so dat hi bluod sturtet ende de gandse die ouer derste waruen uan eighindome bedregen werdet en iar end enen dach mot mene uten hus duon end danne alse dat iar gedan es nemach mene in dit hus uordwardmer niet ontfan het nesi bi der schepenen orloue Worde oc en gands in eigindome uonden ter dod sunder bijchte men soudene grauen buten kerechoue in ene messine