Compilatiecorpus Historisch Nederlands 1.0 (CHN): ambtelijke teksten 1250-1800: gent_1260_1

<begin>
Wi debroeders ende desustre van sente ians hus jn ghent doen cont alledenghenen die dese letteren sullen zien
</begin>
<main>
dat derboidin vt den houe ende verlisebette sin wijf ons gauen in almoesenen xxx sol renten die si cochten an die iiii manmate mersch die ghecocht waren ieghen den her willemme cerheinrikes sone portre van ghent dewelke ligghen indegrote mersch te desselberghine banderzide derkerken dese almoesene gauen deuoerseide her boidin ende verlisebette bi derre voerwaerden dat zi sien sculdech te doen houdene joncurouwen iarghetide mergrieten harre dochter elx iars den nasten dach na sent bauesdach ende doen segghen vighelie ende sielmesse ouer hare siele ende ser boidins vten houe hars vader iarghetide up den iiii dach van aprille alse langhe alse zi leuen ontvaen selue iaerlike in sentebaues daghe die voerseide xx sol ende welc harre zo terst steruet zo zal dit vorseide godeshus nemen die ene x sol ende daeromme auden ewelike sin iaerghetide ende gheuen den capellan van denhus daerof vi d die sal zinghen de vighelie ende demesse met den andren zalmen gheuen elken zieken i pinte wins ende alzo elken van denhus ende dese petancie salmen gheuen iaerlike in dendaghe van deniaerghetide ende alzo ghelike no min nome zo salmen doen met den andren x sol na desanders doet ende ware dat zake datmen alle dese dinghe aldus niet nehilde alze hir voerseit es zoe mochte dat hoer der voerseider cerboidins ende verlisebetten gheuen die xx sol anderen armen bidenrade derprochipapen van sente iacops ende daer of zo zette wise hoec wachters ende alle dese voerwaerden sin ghemaect bi alle denghenen die hebben mesterschep in dit voerseide godes hus
</main>
<end>
ende omme dat dese dinghe alle moghen bliuen ghewarech staende ende zeker zo hebben wi desen tsartre seghelen ghedaen met den seghelen ons hus ende cedekens van den kerstinhede van ghent ende mestergosins ceprochipapen van sente iacops in ghent Anno ab incarnatione dominj m cc lx ad natale dominj
</end>