Compilatiecorpus Historisch Nederlands 1.0 (CHN): ambtelijke teksten 1250-1800: gent_1263_1

<begin>
Wi die berechters sin van sente jans huse van Ghent wi doen te verstane & kenlijc al den ghenen die nu sin & hier na wesen sullen
</begin>
<main>
dat Euerdei dullart & aue sin wif uercochten wettenleke onsen gotshuse i stic lants liggende jn zaemslacht xvi gemete i vierendeel min & jan van den boengarde & aue sin wif uercochten oec wetteleke desen seluen gotshuse iij gemete & i vierendeel liggende an dese vorseide xvi gemete & oem waerscepe te doene van desen iij gemeten dat de coep vast & gestade sal bliuen so sette dese vorseide jan te pande iiii 1/2 gemete lants die hi hadde liggende jn Otene ane spapen Sois gracht & oec daer toe dat hi vrou auen kinder sire Sueger soude eruen jn alse goede iij gemete lants als[e] dese vorseide iij gemete sin welken tijt dat vro aue sin Sueger dot ware & dit uorseide gotshus en hadde jegen vrou auen geen lant gecocht daer jan up was gedaen jn wetteleken huweleke hi ne hadde desen vorseiden pant geset te pande also alse hier vorseit es Ouer dese uorworden waren Scouteten & meieren & Scepenen van den lande & dit gots hus heuets goede lettren & machse wel betogen waer soes te doene es
</main>
<end>
& jn orconde van al desen hebben wi dit gescrifte besegelt met ten segele des gotshus & hebbent besegelt jnt jaer van den carnatione m cc & Lxiij jn den april
</end>