Compilatiecorpus Historisch Nederlands 1.0 (CHN): ambtelijke teksten 1250-1800: gent_1266_1

<begin>
Jc Jan bi der ghenaden ons eren abt van sente pieters van ghent doe verstaen hem allen die dese lettren sullen bescouwen
</begin>
<main>
dat ver lisbette ser boidins wif was vten houe heuet ghegeuen den helegen gheest in sente Marien kerke iiii lib renten iarlike eulike te stane ende te gheuene den armen in sente marien prochie ouer ser boidins ziele uten houe die har man was ende ouer har selues ziele Dese aelmoesne sal men gheuen bi haren rade also lange alsoe leuet Dese rente was ghecocht met haren peneghen xlv lb vlamscer peneghe ende soe leget in onse herscap te wilenghem Ende soe was ghecocht iegen dese liede die hir na staen ghescreuen arnout van den driesche heuet beset den heleghen gheest die hir vorseit es sin lant dat te wilenghem leget in de prochie 1/2 bonre ende i dachwant dat ter coutren leget ende bi smeiers huse van wilenghem 1/2 bunre ende an langhemersch i dachwant ende vp vern adelen velt i dachwant dese summe comt ii bunre i virendeel min dit lant es sculdech den heleghen gheest xl sol eulike elx iars Jan van den driesche heuet beset den seluen heleghen gheest sin lant dat hi heuet te wilenghem dat leget vp vern adelen velt i dachwant te houdenhouen 1/2 dachwacht bi smeiers lande van wilenghem i dachwant ende vp den driesch sin hues ende sine hofstede ende iii dachwant in dalhem Dit lant ende dit hues es sculdech eulike den seluen heleghen gheest xxv sol elx iars Willem van der coutren heuet beset den seluen heleghen gheest sin lant dat hi heuet te wilenghem 1/2 bunre dat leget vp de coutre dat es heltwinninghe ende in tsiuelbosch i dachwant heltwinningen ende vp de coutre iii 1/2 dachwant scoflants ende bi den borne i dachwant ende bi wichhues bi der varnt i dachwant ende sine hofstede dar sin hues vp staet i dachwant tsenslants ende buten der hofsteden dar thues vp staet xiii Roeden dit lant es sculdech eulike den seluen helegen gheest xxxv sol vlamscer peneghe elx iars Van desen lande dat ir vorseit es heuet ghecocht ver lisbette die hir vorseit es iiii lb renten iarlike den helegen gheest ende die xx sol renten die hir ouer comen so hebben ghecocht der boidin van alst der willem ser wouters sone mychil de baccre ende jan ver marten sone die den helegen gheest achterwaren met peneghen die si hebben beiaghet Ouer dese besettingen so waren Godeuert van den campine alse ere van ser ians haluen van mackenhuse prouost van brabant ende alse meiere woutre van materne arnout de holslagere gosin van der coutren arnout van den driesche gosin van der moelen woutre de buc van bost ende boidin valois scepenen van wilenghem Dese rente es men sculdech eulike elx iars in sente marien daghe lichtmesse Ende oec was dar besproken war dat sake dat de ghene die dit goet houdende sin den heleghen gheest die hir vorseit es te sinen termine niet ne gaue sine rente ende de helege gheest bi verleckingen van deser renten scade hadde of cost dade an so wien soet achter bleue soede wesen elker lic iegen den ere in de boete van v sol ende iegen den heleghest van v sol
</main>
<end>
Om dese dinc alst ir vorseit es eulike ghestade ende vast te houdene so baden mi de goedeliede die hir vorseit sin in orcontscepen van desen lettren dat ic minen segel hir ane hinghe int iar van den incarnatione ons eren mcc ende lxvi iar Jn de maent van aprille so waren dese lettren gheconfirmert met minen segele
</end>