Lijst

Compilatiecorpus Historisch Nederlands 1.0 (CHN): ambtelijke teksten 1250-1800: gent_1267_1

<begin>
De prior van den jacopinen ende de groetmeestrigghe van der fermerien van sente lisebetthen ende har raet maken cont al den ghenen die dit ghescrifte sullen sien ende horen
</begin>
<main>
Dat ons vor lisebetthe vten houe gaf ouer hars heren siele Ser boidins vten houe Ende joncurouwen mergrieten siele harre dochter Ende ouer har seluen xxx sol renten elx iars ende die sien wel beset in de prochie van wettre in goeden erue ende die waren ghegheuen in derre maniren Dat de meestrigghe van der fermerien van sente lisebetthen es sculdech te doen houdene Ser boidins iarghetide vten houe vp den vierdendach int beghin van aprille euwelike elx iars ende doen bidden ouer sine siele Ende doen singghen vighelie ende sielmesse Ende dat wi sullen van dien vorseiden xxx sol nemen x sol vp dien dach Ende dar af sulle wi gheuen onsen capelanen xii d Ende den costre iii d Ende doen luden ende bidden ouer sine siele Ende wi sullen gheuen elcken sieken in de fermerie ene pinte wins vp dien dach of dat si lieuer hebben ende die den sieken dinen Ende datter ouer blift dat sal de mesterrigghe gheuen te petansien dart har best dinct up dien dach Ende wi sien oec sculdech te doen houdene joncurouwen mergrieten iarghetide harre dochter elx iars up den nasten dach na sent bauesdach Ende doen oec singhen ouer hare siele vighelie ende sielmesse ende dan sulle wi oec van den vorseiden xxx sol nemen x sol Ende dar af sulle wi oec gheuen onsen capelanen xii d ende den costre iii d ende doen luden ende doen bidden ouer hare siele Ende wi sullen oec gheuen up desen dach elcken sieken ene pinte wins ende allen die hem dinen Ende datter ouerblift van desen x sol dar mede sal men hem gheuen ander petantie Ende de derde x sol sal men gheuen elre darse vor Lisebetthe vten houe het gheuen alse langhe als soe left up alrelgher dach Ende na uor Lisebetthen lief So sien wi sculdech te doene houdene har iarghetide vp den dach dat gheualt euwelike elx iars Ende nemen dese x sol die wi gauen up alrelgerdach Ende doen singhen vighelie ende sielmesse ende gheuen petancie ghelic den andren jarghetiden die hir uorseit sien Ende gheuen den capelanen xii d ende den costre iii d ende elcken sieken ene pinte wins Ende allen die hem dienen Ende doen bidden ouer hare siele ende al ouer harre vrinde siele Ende alle dese drie iarghetide sien wi sculdech te doen houdene euwelike elx iars ende elc up sinen dach alt gheualt ende gheuen petancie also alst uorseit es Ende war dat sake dat men al dese almosene niet en dade also alst hir uorseit es So mochte doer Ser boidins vten houe ende uor lisebetthen siens wiefs of de Deken van den kerstenede weder roupen dese almosene ende gheuen se elre andren armen bi rade spriors uan den jacopinen Dar soe best bestaet ware hir ombe so bidde hic der mesterrigghen van der fermerien ende haren rade dat si dese almosene so wel doen dat hem got mote lonen ende si delachtech moten wesen an alle weldane
</main>
<end>
Ende ombe alle dese dinghe uast ende ghestade euwelike te houdene So hebbe wi dese lettren doen seghelen met den seghele uan onsen gotshuse uan der fermerien Ende met spriors seghele uan den jacopinen jn orconscepen Ende dit was ghedaen int iaer alst carnation ons heren hilt xii c ende lxvii in de mant van meie
</end>