Compilatiecorpus Historisch Nederlands 1.0 (CHN): ambtelijke teksten 1250-1800: gent_1273_1

<begin>
Here Ghiselbrecht ser hughes sone ende here filips vten houe die voghede sijn van den hospitale van sente jans hues van ghent ende de meestrigghe ende die broedere ende de sustere van dien seluen hues maken kenlic ende doen te verstane allen den ghenen die dese lettren sullen zien ofte horen lesen
</begin>
<main>
dat dit vorseide hues es schuldech den hersanderse van den boengarde ix sol siaers te sinen liue Te gheldene elkes iars te tsincsenen ende alse sijns ghebreket soe eist hues quite van diere rente die hier es vorseit Ende ouer dese vorseide rente heuet hi ghe gheven dien vorseiden hues ene hofstede die gheldet ix sol iarlijc die leghet ouer schelde int boengartstratekin naest ere hofsteden dies helechs gheestes es van sente jans van ghent jn de zide ten ramen wart Ende die selue vorseide hofstede heuet hi ghedaen dien vorseiden hues in possessien ewelike te besittene in alemoesenen ouer sine ziele
</main>
<end>
Ende ombe dat wi willen dat dese dinghe sijn vast ende ghestade so hebwi dese lettren gheseghelt metten zeghele van dien vorseiden hospitale van sente jans hues van ghent ende metten zeghelen ser ghiselbrechts ser hughes sone ende ser filips vten houe Dit was ghemaket int iaer ons heren m cc ende lxxiij vp den zondach na tsincsenen
</end>