Compilatiecorpus Historisch Nederlands 1.0 (CHN): ambtelijke teksten 1250-1800: gent_1277_1

<begin> Alle deghene die dese lettre sullen sien moeten bekennen
</begin>
<main>
dat woitin debloc sarboidins cnape sargherelms was ontfinc voer dewet inder meieriggen hws van maelte van den arsimoene roesen i 1/2 bwnre merschs liggende in de hasselt inthersceep van senpieters borende ter kelrien ten gasthuse boef van ghent ende alf de hofstede ende alf de hvsinge die hvp de hofstede staet Daer houer was arian hvten houe kelrewaerdre van sente pieters alse here heinric demoltenere alse baeliv die dewet maende woitin van der beke alse scepene boidin van eke alse scepene woutre wapin roc alse scepene moerin de necker alse scepene gheraert ver mabelien sone alse scepene woutre deraet alse scepene ende jan de wulf alse scepene Hijr na in enen curten tide voer die woitin debloc van liue terdoet also meneghen man kenlic was doe versochte dit vorseide goet domaes demaech voer dese voerseide wet ten gasthuse boef van ghent ende dede daertoe also vele alse wet seide dat hi sculdech was te doene
</main>
<end>
Jn orconscepen dat dit waer es heeft ar jan hvten houe kelrewaerdre van sente pieters hiran ghehangen sinen seghel Dit was ghescreuen int iaer ons heren mcclxxvii jn den naesten dach sente mathevs dach
</end>