Compilatiecorpus Historisch Nederlands 1.0 (CHN): ambtelijke teksten 1250-1800: gent_1278_1

<begin>
Het sij cont alle den ghenen die nu sijn ende hier nae wesen sullen
</begin>
<main>
dat der sanders cranekin der godeuert vanden hues ende der jan ser jans soene ser sanders soene waren daer ouer alse scepenen daer willem brusch ser wasselin brusch soene eeghindomde bider wet van ghent thues ende deerue met alden ghelaeghe datter toe behort dat staet naest godeuert buecs ten ende vander cammerstraten dat sijns heren sijns vaeder was ser wasselin brusch diere vorseit es ouer cc lb vlaemsce alse van sire moeder doede Dit eeghindom was ghedaen int jaer vanden incarnatione ons heren mcc ende lxxiij viertien nacht vor onser vrouwen daghe in haluen hoeste Ende aldus soe verkennet der sanders cranekin der godeuert vanden hues ende der jan ser jans soene ser sanders soene vor den her godeuerde ser ydiers soene haren gheselle alse scepenen Vort soe verkennet dies ghelike der sanders cranekin der jan ser jans soene ser sanders soene ende der godeuert ser ydiers soene alse scepenen haren andren ghesellen den her ghereme vter volrestraten den her volkeren ver margrieten soene den her boidine ser pieters soene ende den her ghiselbrechte ser hughes soene
</main>
<end>
Dit was ghedaen jnt jaer vanden incarnatione ons heren mcc ende lxxviij jnde weke vor chinxenen
</end>