Compilatiecorpus Historisch Nederlands 1.0 (CHN): ambtelijke teksten 1250-1800: gent_1278_2

<begin>
Weten alle deghene die nu siin ende hier na wesen sullen
</begin>
<main>
dat de eleghe ghest van sente niclaus es sculdech eweleke te doen houdene elkes iaers up den vierden dach int beghin van aprille ser boidins iaerghetide uten houe ende doen singhen vighelien ende zielmesse ende gheuen up den seluen dach elken prochipriester van sente niclaus tue scele ende d[en] capelanen van der seluer kerken ses schele ende den costre ses penninghe te doen ludene Ende up den seluen dach den fremeneurs tuintech scele te petancien ende tuintech scele te olien ene lampte mede te doen berne in de capelle daer der boidin uten houe in leghet Ende dese eleghe ghest es hoec sculdech up den naesten dach na sente baues dach te doen houdene ioncvro mergrieten iaerghetide die des voerseits ser boidins dochter was uten houe ende doen singhen vighelien ende zielmesse ende te gheuene up den seluen dach elken prochipriester tualef penninghe ende den capelanen van der seluer kerken drie scele ende den costre vier penninghe Ende den fremeneurs tien scele te petancien Ende voert es sculdech dese eleghe ghest van sente niclaus te gheuene omtrent alre eleghen messe viue ende tuintech paer scoen ende te liinwade souele voert dat comt up drie lb ende ten seluen tiden te gheuene hoec tue lakene van der mans toete vier lb ende heen alf den armen in de prochie daers meest noet es ende doen bidden ouer onse ziele ende ouer al onser vriende ziele ende dese aelmonsene sal men gheuen eweleke elkes iaers bider prochipriesters rade van der seluer kerken ende also langhe alse ver liisbette uten houe leeft bi haren wille Ende na ver liisbetten liif uten houe so es hoec sculdech dese voerseide eleghe ghest up den dach dat gheualt te doen houdene ewelike haer iaerghetide elkes iaers ende doen singhen vighelien ende zielmessen ende doen gheuen elken prochipriester van sente niclaus tue scele ende den capelanen ses scele ende den costre ses penninghe te doen ludene Ende den fremeneurs tuintech scele up den seluen dach te petancien ende te doen biddene ouer onse ziele Ende gheuielt datter enech van den prochipriesters ofte van den capelanen achter bleue van elken van desen iaerghetiden dat sii niet en waren te vighelien ende ter sielmessen dat sii ebben souden up elken dach van desen iaerghetiden dier achter bleuen dat soudemen gheuen den armen clerken dier quamen ter vighelien ende ter zielmessen ofte andren armen Ende te al derre voerseider aelmonsenen ende te desen iaerghetiden ewelike te houdene elkes iaers also sii voerseit siin gaf der boidin uten houe ende ver liisbette siin wiif tien lb elkes iaers ant goet dat de eleghe ghest eft in de prochie van wettre ende dat ghecocht was ieghen ian anghisere ende ieghen andre liede hoec ende dat quite sii toete ondert lb Ende sint cochte ver lisbette uten houe den eleghen ghest viiftech s elkes iaers om sesse ende tuintech lb ant goet dat de eleghe ghest eft in de prochie van eke Bouen al desen gaf ver liisbette uten houe viiftiene lb peneghe na haer liif rente mede te coepene selegs ghests boef om dat so wille ende beghert dat al de aelmonsene die hier voerseit es ende bescreuen wel ende vulcomeleke werde ghedaen Ende wi bidden den prochipriesters van sente niclaus ende den ghenen die meesters siin van den eleghen ghest ende settense hier af in onse stede dat sii elpen dat dese aelmonsene al vulcome ende dat mense doe ewelike elkes iaers also alsoe hier voerseit es ende bescreuen so dat em got moete loenen ende dat sii delen moeten an alle weldade ende doen bidden ouer onse siele ende ouer alle onser vriende siele
</main>
<end>
Ende om alle dese dinghe vaste ende ghestade ewelike ende ghetroueleke te houdene ende also al te vuldoene alset hier voerseit es sonder eneghen scamp so ebben wi prochipriesters van sente niclaus meester doemaes ende meester steuen onse seghele hier an gheanghen in orconscepen Ende wi die meesters siin van den eleghen ghest van sente niclaus van ghent der diederic ute mheram der filips van den huus der ian de grutere ende der boidin lieman ebben selegs ghests seghel der an gheanghen ende ghebeden den deken van den kerstinede dat hier an anghe hoec sinen seghel in orconscepen Ende dese lettren waren ghegheuen <" ende beseghelt int iaer van den incarnatioene ons heren dat men scrift tualef ondert ende achte ende seuentech iaer in de maent die men heet hoimaent
</end>