Compilatiecorpus Historisch Nederlands 1.0 (CHN): ambtelijke teksten 1250-1800: gent_1279_1

<begin>
Wij de sustre ende broedre ende alle die meesters sin van den gasthuse van ghent maken cont ende doen te wetene alle den ghenen die nu sin ende hir na wesen sullen
</begin>
<main>
dat ons uro Lisbette uten houe wedue ser boidins uten houe die portre was tote ghent heuet ghegeuen ouer har siele ende ouer hars heren siele ser boidins uten houe ende ouer alle harre kinder siele v lb ende xvi 1/2 sol goeder renten ewelike elcs iaers ende wel beset in goeden eruen de welke v lb ende xvi 1/2 sol liggen in onse goet dat wi hebben in samslacht ende die soe ons cochte ende wel vergolden heuet lx lb vlamscer peneghe Ende die waren ons ghegeuen jn derre manieren dat wi die meestriggen ende die meesters sin ende alle die na ons comen van den gasthuse te ghent sin sculdech ewelike elcs iaers te doen houdene ser boidins jargetide uten houe vp den virden dach int begin van aprille ende doen singen ouer sinen siele vigelien ende sielmesse ende gheuen elken van onsen pristers vi d ende den costre iij d ende wi sullen oec gheuen vp den seluen dach x s alle onsen sieken ende onsen sustren ende onsen brodren te pitansen ende te wine ende vort sullewi gheuen ewelike elcs iaers al den jacopinen te ghent vp den seluen dach xx s te pitansen ende te wine jn derre manieren dat sij oec sullen singen vigelien ende sielmessen ende doen bidden ouer ser boidins siele uten houe ende ouer alle sire uriende siele Ende wi sin oec sculdech te doen houdene uro megrieten jargetide harre dochter was ewelike elcs iaers vp den nasten dach na sente baues dach ende doen oec singen vigelien ende sielmesse ende gheuen elken van onsen pristers vi d ende den costre iij d ende gheuen oec x s te pitansen ende te wine alle onsen sieken ende onsen sustren ende onsen brodren ende uort sij wi oec sculdech te gheuene den vorseiden jacopinen up den seluen dach xx s te haren cledren ewelike elcs iaers Ende wi sin oec sculdech te doen houdene mir uro heilwiuen jargetide van popperode die der vorseider uro lisbetten dochter was ewelike elcs iaers vp den derden dach na onser urouwen dach Lichtmesse ende doen oec singen vigelien ende sielmesse ende gheuen elken van onsen pristers vi d ende den costre iij d ende gheuen oec x s te pitansen ende te wine alle onsen sieken ende onsen sustren ende onsen brodren Ende wi oec sculdech te doen houdene Joncuro lisbetten jargetide die oec har dochter was ewelike elcs iaers vp den derden dach vore sente ihans dach baptist in midden somre ende doen oec singen vigelien ende sielmesse ende gheuen elken van onsen pristers vi d ende den costre iij d ende geuen oec x s te pitansen ende te wine alle onsen sieken ende onsen sustren ende onsen brodren Ende uoert na uro lisbetten lijf uten houe dier vorseit es soe sij oec sculdech te doen houdene har jargetide vp den seluen dach dat geualt ewelike elcs jars ende doen singen vigelien ende sielmesse ende geuen elken van onsen pristers vi d ende den costre iij d ende geuen oec x s te pitansen ende te wine alle onsen sieken ende onsen sustren ende onsen brodren Ende wi sullen oec gheuen van der vorseider renten xx s alden jacopinen te gent ewelike elcs jars te pitansen ende te wine jn derre manieren dat sij sullen singen vigelien ende sielmessen vp den seluen dach ende doen bidden ouer har siele ende ouer al harre vriende siele Ende also lange alse uro lisbette leuet so sullewi dese xx s gheuen dar soese heet gheuen Ende alle dese vijf iargetiden sin wi sculdech te doen houdene ewelike elcs iars ende alle die na ons comen ende elc vp sinen dach also alst geualt ende also alse hir vorseit sin ende bescreuen Ende dese vorwarden sin gemaect om den orbore van onsen hus ende om den nutscepe van den sielen bi alle den ghenen die hebben meesterscep jnt gasthus te ghent
</main>
<end>
Ende om alle dese dinge vaste ende gestade ewelike te houdene ende also te wldoene alsij hir vorseit sin ende bescreuen so hebbe wi dese lettren gesegelt met onsen segele van onsen godshuse in orconscepe Ende vort hebbe wi gebeden ende bidden min her boidine ser gherems sone die onse meester es dat hire sinen seghel ane hanghe in orconscepe Dese lettren waren gemaect jnt jar alst jncarnatioen ons heren hilt mcc ende lxxviij jn de maent van sporkele
</end>